Прэзыдэнт Украіны Пётар Парашэнка падпісаў указ аб адклiканьнi прадстаўнікоў Украіны з статутных органаў Садружнасьці незалежных дзяржаваў (СНД).
«Нам там няма чаго больш рабіць — мы рухаемся разам у Эўропу», — заявіў ён падчас паездкі ў Вінніцу.
Фармальна Кіеў пакуль застаецца ўдзельнікам Садружнасьці. Для юрыдычнага спыненьня сяброўства Ўкраіне неабходна афіцыйна інфармаваць выканкам арганізацыі за год да выхаду.
2 траўня Рада нацыянальнай бясьпекі і абароны Ўкраіны падтрымала прапанову спыніць удзел украінскіх прадстаўнікоў у дзейнасьці органаў СНД.
Пагадненьне аб стварэньні СНД 8 сьнежня 1991 падпісалі Расея, Украіна і Беларусь. У студзені 93 году на саміце СНД у Менску Украіна не падпісала прыняты Статут Садружнасьці. Ад вясны 2014 Кіеў не бярэ ўдзелу ў мерапрыемствах СНД.
