У Лідзе шостыя суткі працягваюць галадаць дзьве актывісткі руху «Маці 328» — Людміла Лапко і Алена Мікалаюк. Сёньня прадстаўнікі райвыканкаму пацікавіліся станам здароўя адной зь іх, Людмілы Лапко.
Што важна ведаць пра галадоўку «Маці 328»:
- Людміла Лапко і Алена Мікалюк зь Ліды пачалі галадоўку 10 траўня.
- 27 красавіка актывісты руху «Маці 328» у Калінкавічах на Гомельшчыне і ў вёсцы Востраў на Меншчыне распачалі галадоўку. Акцыя доўжылася 15 дзён.
- Саўмін накіраваў у Палату прадстаўнікоў законапраект аб зьмене наркатычнага артыкула.
- Раней Лукашэнка дапусьціў магчымасьць паслабленьняў адказнасьці спажыўцоў наркотыкаў.
- Удзельнікі галадоўкі патрабуюць перагляду жорсткіх прысудаў, якія выносіліся ад 2013 году паводле 328 артыкула КК кодэксу (ад 5 да 25 гадоў пазбаўленьня волі), а таксама зьменаў у заканадаўства.
Людміла Лапко галадае ў сваім доме, яна ў адпачынку і ня ходзіць на працу. Сёньня, паводле Лапко, да яе патэлефанаваў намесьнік старшыні райвыканкаму Віктар Пранюк і пацікавіўся здароўем, сказаў, што да яе прыйдзе лекар.
«Сапраўды, пазьней прыйшоў лекар з гарадзкога шпіталя і ўчастковы лекар. Паслухалі мяне, выпісалі лекі, і заўтра я пайду ў шпіталь, каб мне зрабілі кардыяграму. Я асабліва ні на што ня скардзілася, але яны ўзялі зь мяне абяцаньне, што буду выконваць іх прадпісаньні», — сказала Свабодзе Лапко.
Тэлефанаваньнем з райвыканкаму Лапко была зьдзіўленая, бо яшчэ раніцай казала, што ніхто з уладаў не зьвяртае на ейныя праблемы ўвагі. Дадала, што Пранюк абяцаў запісаць яе на прыём да дэпутата Палаты прадстаўнікоў: маўляў, вам нічога самой ня трэба рабіць.
Другая галадоўніца, Алена Мікалаюк, працягвае штодня хадзіць на працу. Да яе ніхто з райвыканкаму не тэлефанаваў, і па мэдыцынскую дапамогу яна не зьвярталася.
«Я пакуль сама прытрымліваюся ўсіх рэкамэндацый, якія трэба выконваць падчас галадоўкі, і сёньня нават стала лепей, нібы адкрылася другое дыханьне», — сказала Свабодзе Мікалаюк.
Наконт спыненьня галадоўкі абедзьве жанчыны пакуль ня вызначыліся. Але, паводле іх, у чацьвер 17 траўня, магчыма, будзе прынята нейкае рашэньне.
