28 палестынцаў забітыя ізраільскімі вайскоўцамі на мяжы сэктару Газа і Ізраілю падчас акцыі супраць адкрыцьця амбасады ЗША ў Ерусаліме. Каля 900 чалавек атрымалі раненьні, у тым ліку 450 — агнястрэльныя, паведамляе агенцтва Reuters са спасылкай на прадстаўнікоў міністэрства аховы здароўя Палестынскай аўтаноміі.
Паводле тэлеканалу Al Jazeera, у пратэстах прымаюць удзел каля 10 тысяч палестынцаў. Некаторыя пратэстоўцы спрабавалі перасекчы памежную агароджу.
Ізраільскія вайскоўцы абвінавацілі ў падбухторваньні групоўку Хамас, якая кантралюе Палестынскую аўтаномію.
Напярэдадні Армія абароны Ізраілю пры дапамозе ўлётак заклікала жыхароў Газы адмовіцца ад масавых пратэстаў і не перасякаць памежных загародаў.
У сьнежні 2017 году прэзыдэнт ЗША Дональд Трамп прыняў рашэньне перанесьці амэрыканскае пасольства ў Ізраілі з Тэль-Авіву ў Ерусалім. Рашэньне Трампа рэзка раскрытыкавалі лідэры арабскіх краін, а таксама прадстаўнікі Эўразьвязу.
Адкрыцьцё амэрыканскага пасольства ў Ерусаліме
30 сакавіка на мяжы сэктару Газа і Ізраілю палестынцы пачалі шматдзённую акцыю пратэсту «Вялікі марш вяртаньня». Па словах арганізатараў акцыі, яны хочуць прыцягнуць увагу да лёсу жыхароў аўтаноміі, якія, як цьвердзіцца, ня могуць вярнуцца ў дамы сваіх продкаў на тэрыторыі Ізраілю.
