Палітычныя ахвяраваньні, сямейныя сувязі з расейскім мільярдэрам, які знаходзяцца пад санкцыямі ЗША, і раптоўнае ўварваньне ў сьвет відэагульняў — вось некалькі прычын, чаму апошнія месяцы нью-ёркская інвэстыцыйная фірма Columbus Nova апынулася ў поле зроку амэрыканскіх СМІ.
Цяпер, як паведамляецца, да гэтай кампаніі прыцягнутая ўвага амэрыканскага спэцыяльнага пракурора Робэрта Мюлера, які расьсьледуе справу аб меркаваным умяшаньні Расеі ў палітыку ЗША і магчымых сувязях паміж паплечнікамі прэзыдэнта Дональда Трампа і Расеяй. Тэлеканал CNN і газэта New York Times паведамілі, што ў ходзе расьсьледаваньня Мюлера былі дапытаныя расейскі мільярдэр Віктар Вексельберг, які трапіў у красавіку пад санкцыі ЗША, і яго стрыечны брат Эндру Інтратэр, выканаўчы дырэктар Columbus Nova.
У Columbus Nova заявілі, што раней кампаніяй быў наняты адвакат Трампа, Майкл Коэн, у якога ў мінулым месяцы ФБР правяло ператрус. Трамп асудзіў гэты рэйд, назваўшы расьсьледаваньне Робэрта Мюлера «паляваньнем на вядзьмарак».
Заява кампаніі зьявілася пасьля таго, як адвакат порнаакторкі, якая падала ў суд на Трампа, абнародаваў 8 траўня дакумэнты, у якіх сьцьвярджалася, што ў мінулым годзе Columbus Nova заплаціла каля 500 тысяч даляраў фірме, якую па сутнасьці кантраляваў Коэн.
Вось некалькі фактаў пра Columbus Nova, уключаючы яе сувязі з Расеяй і Віктара Вексельберга.
Бізнэс-кансультант
Columbus Nova заявіла, што наняла Майкла Коэна як «бізнэс-кансультанта адносна патэнцыйных крыніц капіталу, інвэстыцый у нерухомасьць і іншыя прадпрыемствы», але не паказала, колькі яму плацілі. У фірме таксама адмаўляюць, што Віктар Вексельберг «выкарыстаў Columbus Nova ў якасьці каналу для плацяжоў Майклу Коэну», дадаўшы, што кампанія ніколі не «належала якой-небудзь замежнай арганізацыі ці асобе» і «на 100 адсоткаў належыць» грамадзянам ЗША «з моманту яе заснаваньня амаль 20 гадоў таму».
«Ні Віктар Вексельберг, ні хто-небудзь яшчэ за межамі Columbus Nova ня браў удзел у рашэньні аб найманьні Коэна і ня падаваў фінансаваньне для яго ўдзелу », — сказалі ў кампаніі. Там жа дадалі: «Columbus Nova сама па сабе цяпер і не належыць ніводнай замежнай юрыдычнай асобе або фізычнай асобе», уключаючы Вексельберга або кампанію Renova Group, кантраляваную расейскім мільярдэрам.
Партнэр Вексельберга
Columbus Nova, галаўны офіс якой знаходзіцца ў Нью-Ёрку, зьяўляецца прыватнай кампаніяй, заснаванай у 2000 годзе, згодна зь яе вэб-сайтам і нарматыўным дакумэнтам ЗША.
У сьнежні 2016 году кампанія заявіла, што кіруе актывамі на суму больш чым 15 мільярдаў даляраў.
Фірма таксама мае цесныя сувязі з групай кампаній Renova, якая трапіла пад санкцыі ЗША ў красавіку. Columbus Nova заяўляе, што Renova Group была яе найбуйнейшым кліентам, калі была першапачаткова сфарміравана пад назвай Renova U. S. Management. На сайце Renova Group з моманту ўводу супраць яе санкцый вісіць аб’ява, што ён знаходзіцца ў стадыі распрацоўкі. Але сайт раней паказваў Columbus Nova у карпаратыўнай структуры Renova.
У 2007 годзе Камісія ЗША па каштоўных паперах і біржам назвала Columbus Nova «заснаваным у ЗША філіялам групы кампаній Renova, аднаго з найбуйнейшых стратэгічных інвэстараў Расеі ў мэталюргічнай, нафтавай, машынабудаўнічай, горназдабыўной, хімічнай, будаўнічай, жыльлёва-камунальнай і фінансавай сфэрах».
«Кузэн» Вексельберга
Тыя ж самыя файлы Камісіі ЗША па каштоўных паперах і біржам ідэнтыфікуюць грамадзяніна ЗША Эндру Інтратэра як «стрыечнага брата Вексельберга».
Яшчэ 9 траўня сайт Columbus Nova паказваў, што Эндру Інтратэр — «былы дырэктар і цяперашні член выканаўчага савета групы Renova». Яго біяграфія не была даступная на вэб-сайце пазьней у той жа дзень, але архіўная вэрсія старонкі застаецца даступнай.
У 2014 годзе Эндру Інтратэр таксама працаваў у наглядальным савеце «Акадо», маскоўскай тэлекамунікацыйнай кампаніі, якая належыць Renova.
Эндру Інтратэр не адказаў на запыт аб інтэрвію з нагоды дзелавых адносін паміж Columbus Nova і Майклам Коэнам.
Ахвяраваньні на інаўгурацыю Трампа
У адпаведнасьці з заявамі Фэдэральнай выбарчай камісіі ЗША (FEC), Эндру Інтратэр ахвяраваў 250 тысяч даляраў у інаўгурацыйны камітэт Трампа.
Ён таксама вылучыў 35 тысяч даляраў для камітэту па зборы сродкаў, які падтрымлівае кампанію Трампа, паводле заявы FEC. У гэтым запісы пералічаныя працадаўцы Эндру Інтратэра, сярод іх кампанія Renova US Management, LLC, якая таксама вядзе бізнэс як Columbus Nova і / або Columbus Nova Technology Partners, паводле дадзеных Камісіі па каштоўных паперах і біржах ад 2013 году.
Эндру Інтратэр таксама ўнёс 29 600 даляраў у нацыянальны камітэт Рэспубліканскай партыі ЗША ў чэрвені 2017 году, згодна з інфармацыяй Цэнтру адказнай палітыкі, які адсочвае паходжаньне грошай у палітычных кампаніях.
Відэагульня FALLOUT
Сувязі Columbus Nova зь Віктарам Вексельбергам і Renova таксама нарабілі шуму ў сьвеце відэагульняў. У адпаведнасьці з прэс-рэлізам, у 2015 годзе інвэстыцыйная фірма набыла распрацоўшчык відэагульняў Sony Online Entertainment за неназваную суму і пераназвала кампанію ў DayBreak Games. У прэс-рэлізе Джэйсан Эпштейн назваў набыцьцё «выдатным дадаткам» да існуючага партфэлю Columbus Nova ў галіне тэхналёгій, мэдыя і забаўляльных кампаній.
Але DayBreak Games дыстанцыявалася ад Columbus Nova, паколькі міністэрства фінансаў ЗША ў мінулым месяцы наклала санкцыі супраць Віктара Вексельберга і Renova, а таксама іншых расейскіх бізнэсоўцаў, чыноўнікаў і юрыдычных асобаў.
Дадатак да «Групаў нянавісьці»
Газэта «Вашынгтон пост» правяла ўласнае расьсьледаваньне і выявіла, што Columbus Nova значыцца ў якасьці асобы, якая падала заяву аб рэгістрацыі некалькіх сайтаў, у назьве якіх ёсьць alt-right — альтэрнатыўныя правыя, або альт-правыя (гэтыя групы, у асноўным прыхільнікі перавагі белай расы, больш радыкальныя, чым ультраправыя): Alt-right.сo, Alternate-right.com, Alternate-rt.com, Alt-rite.com і таму падобныя.
Ніводзін з гэтых сайтаў у цяперашні час ня дзейнічае, і немагчыма вызначыць, заўважае «Вашынгтон пост», ці былі гэтыя сайты калі-небудзь дзеючымі, але рэгістрацыя адбылася праз два дні пасьля выступу кандыдата ў прэзыдэнты ЗША Гілары Клінтан у жніўні 2016 году, у якім яна жорстка раскрытыкавала дзеяньні ультраправых груповак.
Па зьвестках газэты, у якасьці фізычнай асобы, якая падала запыт на рэгістрацыю сайтаў, выступіў Фрэдэрык Інтратэр, брат Эндру Інтратэра, які працуе ў Columbus Nova ў якасьці мэнэджэра па дызайне. Прадстаўнік Columbus Nova заявіў газэце «Вашынгтон пост», што Фрэдэрык не выступаў ад імя кампаніі, калі рэгістраваў сайты, нягледзячы на тое, што пісаў з рабочай электроннай пошты і ўнёс імя кампаніі ў рэгістар.
У жніўні 2017 году марш правых радыкалаў у Вірджыніі скончыўся беспарадкамі, загінуў адзін чалавек, каля двух дзясяткаў атрымалі раненьні.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў