Пра гэта гаворыцца ў паведамленьні ў твітэры, распаўсюджаным прэс-сакратаром амерыканскага дыпляматычнага ведамства Гэзэр Наўэрт.
У ім адзначаецца, што «палітычныя лідэры, якія ўпэўненыя ў сваёй легітымнасьці, не арыштоўваюць мірных апанэнтаў за ўдзел у пратэсьце».
Эўразьвяз таксама асудзіў затрыманьні дэманстрантаў і прымяненьне гвалту, якое па ацэнцы прадстаўнікоў ЭЗ, пагражае свабодзе выказваньня, меркаваньня і свабодзе сходаў. Прадстаўнікі зьнешнепалітычнага ведамства ЭЗ засьведчылі неабходнасьць абароны фундамэнтальных правоў, замацаваных у Канстытуцыі Расеі.
Антыўрадавыя мітынгі «Ён нам не цар», прымеркаваныя да інаўгурацыі Пуціна 7 траўня, напярэдадні прайшлі ў дзясятках гарадоў краіны.
Праваабарончы партал «ОВД-ИНФО» паведамляе, што па ўсёй Расіі былі затрыманыя амаль 1600 чалавек. Найбольшая колькасць затрыманых у Маскве і Санкт-Пецярбургу — 704 і 229 чалавекі адпаведна. У Чэлябінску паліцыя затрымала 164 чалавекі. Дзесяткі мітынгоўцаў затрыманыя ў Якуцку, Краснаярску, Краснадары, Калузе і Новакузнецку.
Па словах відавочцаў, паліцыя дзейнічала вельмі жорстка.
Апазыцыянэр Аляксей Навальны таксама быў затрыманы. Яго адпусьцілі з аддзяленьня толькі а палове першай ночы. Ён паведаміў у твітары, што супраць яго заведзеныя дзьве адміністрацыйныя справы — за парушэньне правілаў правядзеньня мітынгу і аб непадпарадкаваньні паліцэйскаму. Суд над Навальным адбудзецца 11 траўня.
Сам ён пракамэнтаваў сытуацыю так: «Відаць прыйшла каманда — да інаўгурацыі не саджаць».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў