Прынамсі 29 чалавек, у тым ліку дзевяць журналістаў, загінулі ў выніку выбуху ў сталіцы Аўганістану Кабуле. Пра гэта паведамляе тэлеканал CNN са спасылкай на афіцыйныя крыніцы.
Паводле дадзеных тэлеканалу, першы выбух адбыўся прыкладна а 8 раніцы па мясцовым часе ў раёне Шаш Дарак. Там разьмешчанае пасольства ЗША і аўганскія ўрадавыя будынкі. Журналісты прыбылі на месца здарэньня.
Другі выбух прагрымеў, калі тэрарыст-сьмяротнік, замаскаваны пад тэлеапэратара, прывёў у дзеяньне выбуховае прыстасаваньне. Гэта адбылося на месцы першага выбуху.
Гібель дваіх журналістаў Абадулы Хананзія и Сабавуна Какара пацьвердзіла Аўганская служба Радыё Свабода. Інфармацыйнае агенцтва France Press паведаміла аб гібелі свайго фатографа. Сярод іншых ахвяраў карэспандэнты Tolonews, 1TV і Mashal TV.
Адказнасьць за тэракт узяла на сябе тэрарыстычная групоўка «Ісламская дзяржава», паведамляе агенцтва Associated press.
Побач зь месцам выбуху, акрамя амбасады ЗША, знаходзяцца штаб-кватэра NATO, будынкі ўраду Аўганістану, уключаючы прэзыдэнцкі палац, міністэрства абароны і штаб-кватэра выведслужбаў Аўганістану.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў