Прэзыдэнт Армэніі Армэн Саргсьян сустрэўся з былым прэмʼер-міністрам Сэржам Саргсьянам і выконваючым абавязкі кіраўніка ўрада Карэнам Карапэт’янам. Пра гэта паведамляе прэс-служба прэзыдэнта. У паведамленьні адзначаецца, што ён працягвае палітычныя кансультацыі для зьніжэньня ўзроўню ўнутрыпалітычнай напружанасьці.
З сярэдзіны красавіка ў Армэніі праходзяць акцыі супраць прызначэньня былога прэзыдэнта краіны Сэржа Саргсьяна на пасаду прэмʼер-міністра. Пратэсты ўзначаліў апазыцыйны дэпутат Нікол Пашыньян. 23 красавіка Сэрж Саргсьян сышоў у адстаўку з пасады прэмʼер-міністра. Затым у адстаўку сышоў урад, а паўнамоцтвы прэмʼер-міністра перайшлі да першага віцэ-прэмʼера, чальца кіроўнай Рэспубліканскай партыі Армэніі Карэна Карапэт’яна.
Нацыянальны Сход рэспублікі абмяркуе пытаньне аб выбарах новага прэмʼер-міністра на спэцыяльным пасяджэньні 1 траўня. Пашыньян заклікаў грамадзян выйсьці ў гэты дзень на вуліцы і плошчы Ерэвана. Перамовы паміж Пашыньянам і Карапэт’янам з нагоды магчымай кандыдатуры часовага прэмʼера праваліліся, таму што Пашыньян настойвае, што прэмʼерам ня можа быць прадстаўнік кіроўнай Рэспубліканскай партыі.
