На сумеснай прэс-канфэрэнцыі пасьля перамоваў прэзыдэнт ЗША Дональд Трамп адзначыў важнасьць амэрыкана-нямецкага супрацоўніцтва ў сфэры забесьпячэньня міжнароднай бясьпекі, эўраатлянтычнага супрацоўніцтва і эканомікі.
Разам з тым Трамп яшчэ раз заявіў пра важнасьць таго, каб усе краіны-члены NATO ўносілі неабходны ўклад на патрэбы калектыўнай абароны альянсу.
Адказваючы на пытаньні журналістаў, Трамп і Мэркель выказалі агульную пазыцыю па санкцыях супраць Расеі, мэта якіх — прымусіць Расею выконваць міжнароднае права, паважаць сувэрэнітэт і тэрытарыяльную цэласнасьць Украіны.
У сваю чаргу канцлер Нямеччыны Ангела Мэркель, адзначыўшы стратэгічны характар саюзных адносінаў Нямеччыны і ЗША, зьвярнула ўвагу на розьніцу падыходаў Бэрліну і Вашынгтону да дзейнай ядзернай дамовы з Іранам.
Прэзыдэнт Трамп да 12 траўня павінен вырашыць пытаньне аб выхадзе з мiжнароднай дамовы 2015 году і аб увядзеньні санкцыяў у дачыненьні да Тэгерану.
Раней на гэтым тыдні Трамп вітаў у Белым доме іншага эўрапейскага саюзьніка — францускага прэзыдэнта Эманюэля Макрона, які таксама зьяўляецца прыхільнікам захаваньня ядзернага пагадненьня з Іранам.
Перад прыбыцьцём у Вашынгтон Ангела Мэркель прызнавала, што паспрабуе паўплываць на пазыцыю прэзыдэнта ЗША ў гэтым пытаньні.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў