Распачалося галасаваньне за «Кнігу году» — прэмію, якую ўручаюць самі пісьменьнікі за найлепшую кнігу, напісаную беларусам ці ў Беларусі на любой мове, якой карыстаюцца беларусы. Пра гэта паведамляе Беларускі ПЭН-Цэнтар.
Прэмія прысуджаецца за найлепшую кнігу, выдадзеную ў 2017 годзе. На выбар кнігі-пераможцы можа паўплываць кожны сябар журы, па сутнасьці — любы беларускі літаратар.
Пераможца атрымае прыз памерам 1000 эўра ў рублёвым эквіваленце паводле курсу Нацбанку.
У журы прэміі «Кніга году» можа ўвайсьці любы пісьменьнік альбо перакладчык, які цягам апошніх сямі гадоў выдаў хаця б адну мастацкую або нон-фікшн кнігу. Для таго, каб прагаласаваць, трэба да 5 траўня запоўніць форму на сайце прэміі.
Уручэньне прэміі адбудзецца ў другой палове траўня.
Папярэднія пераможцы:
Альгерд Бахарэвіч. Дзеці Аліндаркі (проза)
Антон Рудак. Верхні горад (паэзія)
Вольга Гапеева. Сумны суп, Людміла Рублеўская. Авантуры студыёзуса Вырвіча (дзіцячая літаратура)
Андрэй Хадановіч. Нататкі таткі
Наста Кудасава. Маё невымаўля
