Міністэрства замежных спраў Канады паведаміла, што адклікае сям’і дыпляматычнага пэрсаналу на Кубе, бо вывучае «незвычайныя сымптомы, зьвязаныя са здароўем», на якія скардзяцца супрацоўнікі амбасады ў Гаване.
16 красавіка Global Affairs Canada паведаміла, што існуе «незразумелая сытуацыя» ў дачыненьні да прычын таямнічых сымптомаў, выяўленых у 10 чалавек, разьмешчаных на Кубе.
Мужы, жонкі, дзеці і бацькі дыпляматаў, якія цяпер знаходзяцца на Кубе, пакідаюць краіну, гаворыцца ў заяве.
Амэрыканскія дыпляматы, якія знаходзяцца на Кубе, паведамлялі аб падобных сымптомах, пачынаючы з 2016 году, калі Вашынгтон выявіў ўзьдзеяньне ультрагукавых прыладаў у дачыненьні да дыпляматаў. Былы дзяржаўны дзяржсакратар ЗША Рэкс Тылерсан сказаў, што сымптомы былі вынікам «мэтанакіраваных нападаў», але не ўдакладняў, хто можа быць адказным за іх.
Куба адмаўляе ўдзел у якой-небудзь шкоднаснай дзейнасьці і сьцьвярджае, што ёй не вядома пра такое. Паводле кубінскіх уладаў, уласнае дасьледаваньне хвароб не выявіла таго, што людзі былі наўмысна атручаныя. Канада паведаміла 16 красавіка, што амэрыканскія і канадзкія спэцыялісты, якія вывучалі пацярпелых канадцаў, выказалі асьцярогі з нагоды «новага тыпу магчымай чэрапна-мазгавой траўмы».
«Для лепшага разуменьня неабходныя дадатковыя дасьледаваньні. Прычына застаецца невядомай, але, магчыма, яна была створана чалавекам», — гаворыцца ў заяве.
У заяве адзначаецца, што тэставаньне якасьці вады і паветра пакуль не выявіла магчымага тлумачэньня сымптомаў.
