У Магілёве перад былым заводам штучнага валакна, які ідзе пад знос, дэмантавалі і помнік Леніну.
У сквэрыку, разьбітым перад адміністрацыйнымі будынкамі прадпрыемства, замест помніка застаўся груд бэтоннага друзу і пяску. Завадзкую дошку гонару не кранулі. Закінутым застаецца фантан, які ўпрыгожваў сквэр, над якім і узвышалася постаць Леніна ў поўны рост.
Зьнікненьне помніка, які хавалі елкі, не заўважылі мінакі.
«І праўда прыбралі», — сказаў адзін з іх і дадаў: «Як заводу няма, што яму тут рабіць».
Пабураны завод запусьцілі ў 1930-я гады. У тыя часы прадпрыемства стала найвялікшым у горадзе. На ім працавала больш за дзьве тысячы чалавек. У Магілёў прыехала шмат спэцыялістаў-хімікаў зь іншых рэгіёнаў Савецкага Саюзу.
Пра намеры закрыць завод упершыню загаварылі ў студзені 2012 году. Тады гэта называлася рэарганізацыяй. Вырабляць сынтэтычную плёнку стала нерэнтабэльна. Прадаць прадпрыемства не ўдалося.
Пабурыць завод даў даручэньне Аляксандар Лукашэнка. Работы маюць завяршыцца сёлета ў траўні.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў