У Гомелі засудзілі 10 кіраўнікоў і спэцыялістаў мясакамбінату — за выраб каўбас і кансэрваў з гнілога мяса. Шкода Гомельскаму мясакамбінату толькі ад дзеяньняў былога дырэктара Рычарда Стэфановіча была ацэненая ў 73,5 тысячы рублёў.
У Гомельскім абласным судзе 25 красавіка судзьдзя Мікалай Доля агучыў вырак дзесяці кіраўнікам і спэцыялістам ААТ «Гомельскі мясакамбінат». Вырак вынесены таксама былому намесьніку міністра сельскай гаспадаркі Беларусі Васілю Півавару, а таксама рэгіянальным і менскім вэтэрынарам.
Яны прызнаныя вінаватымі ў псаваньні на камбінаце 178 тон мяса, зь якога выраблялі кансэрвы і каўбасы.
Адны злоўжывалі, другія бязьдзейнічалі
Судовае сьледзтва пацьвердзіла віну кіраўнікоў і спэцыялістаў у злоўжываньні ўладай і службовымі паўнамоцтвамі, бязьдзеяньні, а таксама ў дзеяньнях супраць інтарэсаў службы з карысьлівых памкненьняў.
Генэральны дырэктар мясакамбінату Рычард Стэфановіч пакараны 6 гадамі калёніі агульнага рэжыму з выплатай кампэнсацыі нанесенай прадпрыемству шкоды ў памеры 24,5 тысячы рублёў. Яго ўзялі пад варту ў залі суда.
У апошнім слове перад прысудам Стэфановіч прасіў даць яму пакараньне, не зьвязанае з пазбаўленьнем волі. Ён чарнобыльскі ліквідатар, інвалід 3-й групы. Паведаміў таксама, што амаль трыццаць гадоў працаваў на кіроўных пасадах. На мясакамбінаце імкнуўся «максымальна атрымліваць прыбытак з усіх вытворчых працэсаў, гандлёвых апэрацый, забясьпечыць усім работнікам — а іх разам з гандлем 1,5 тысячы — годны заробак».
Намесьнік генэральнага дырэктара па вытворчасьці Аляксандр Бандарэнка і галоўны вэтэрынарны лекар прадпрыемства Ігар Сямёнаў атрымалі аднолькавае пакараньне — па 5 гадоў калёніі агульнага рэжыму з выплатай кампэнсацыі нанесенай прадпрыемству шкоды ў памеры 18,3 тысячы рублёў кожнаму.
Начальнік халадзільніка Ігар Мельнікаў за прызнаньне віны і супрацоўніцтва са сьледзтвам атрымаў мякчэйшы прысуд — 3 гады калёніі з выплатай кампэнсацыі ў памеры 12,2 тысячы рублёў.
Кіраўніку гарадзкой вэтстанцыі Віктару Валчанкову прысудзілі 2 гады пазбаўленьня волі, начальніцы ўпраўленьня вэтэрынарыі камітэту сельскай гаспадаркі і харчаваньня Гомельскага аблвыканкаму Але Лазоўскай — 1,5 года.
Міністэрскае «карэктаваньне»
Сталічнага правяральніка Гомельскага мясакамбінату Аляксандара Букіна з дэпартамэнту вэтэрынарнага кантролю, які не адлюстраваў рэальны стан захаваньня і перапрацоўкі мяса на прадпрыемстве, пазбавілі волі на 2 гады, а былога намесьніка міністра сельскай гаспадаркі Беларусі, галоўнага вэтэрынарнага лекара краіны Васіля Півавара асудзілі на 2 гады калёніі ўзмоцненага рэжыму.
Ён на просьбу гендырэктара Стэфановіча, зь якім меў сяброўскія стасункі, праз дырэктара вэтэрынарнага дэпартамэнту паспрыяў «карэктаваньню» высноваў менскай камісіі.
Двухгадовым тэрмінам пазбаўленьня волі пакараныя і астатнія фігуранты «мясной справы». Вэтэрынарны ўрач камбінату Арсень Скварчэўскі асуджаны на два гады калёніі-пасяленьня. Вырак яшчэ не набыў моцы — яго можна абскардзіць альбо апратэставаць.
Таксама ўсіх іх пазбавілі права займаць адказныя пасады цягам 5 гадоў. Пакараныя работнікі камбінату павінны кампэнсаваць нанесеную шкоду ў памеры 681 тысяч рублёў.
Ім залічаны тэрмін знаходжаньня пад вартай падчас сьледзтва — дзень за дзень.
Паставілі пад пагрозу здароўе і жыцьцё людзей
Паводле сьледзтва і высноваў суду, згаданыя кіраўнікі прадпрыемства ў 2015 годзе змарнавалі 178 тон ялавічыны і сьвініны на 7,2 мільярда недэнамінаваных рублёў. Жывёлу на мясакамбінаце забівалі зь перавыкананьнем заданьняў. Лядоўні завалілі сьвінымі і каровінымі паўтушамі. Звальвалі тыя паўтушы нават у тэхналягічных калідорах халадзільнага цэху. Тэмпэратурны рэжым ня ўсюды вытрымліваўся, шэраг лядоўняў мелі патрэбу ў рамонце і дэзынфэкцыі. Мяса ў іх пачарнела, пакрылася «пушком», пачало тхнуць гнілізнай. Шмат якія паўтушы пагрызьлі мышы, пакідаючы пасьля сябе сьляды зубоў і экскрэмэнты.
Каб схаваць безгаспадарчасьць, на камбінаце арганізавалі перапрацоўку гнілога мяса ў каўбасным цэху, а таксама падзяліліся ім з Аршанскім камбінатам. А той вырабіў зь яго звыш 3 тысяч штук мясных кансэрваў пад назвай «Ялавічына тушаная дамашняя». Няякасную прадукцыю накіроўвалі таксама ў гандлёвую сетку Гомля і нават у камбінат школьнага грамадзкага харчаваньня.
Як зазначылі падчас судовых спрэчак супрацоўнікі абласной пракуратуры, якія падтрымлівалі дзяржаўнае абвінавачваньне, кіраўнікі і вэтэрынары ўтойвалі рэальную сытуацыю на мясакамбінаце, каб паказаць сябе гаспадарлівымі людзьмі, годнымі спэцыялістамі, якія ведаюць сваю справу. Бо за гэтым стаялі надбаўкі, прэміі. Зацікаўленьне мелі і прадстаўнікі Мінсельгасхарчу — ім трэба было паказаць, што Гомельскі мясакамбінат уваходзіць у лік надзейных экспартэраў мясной прадукцыі за мяжу. Пры гэтым ніхто зь фігурантаў «мясной справы» асабліва не думаў пра тое, што сваімі дзеяньнямі яны ставяць пад пагрозу здароўе і нават жыцьцё людзей, якія спажываюць мясную прадукцыю.
Судзяць групамі
Цяперашні гучны судовы працэс над дзясяткам кіраўнікоў і спэцыялістаў Гомельскага мясакамбінату ня першы ў найноўшай гісторыі. У чэрвені 2012 году калегія крымінальных спраў Гомельскага абласнога суду абвясьціла прысуд 25 кіраўнікам, спэцыялістам і шараговым работнікам мясцовага мясакамбінату, а таксама 3 міліцыянтам, якія мелі дачыненьне да буйных крадзяжоў на прадпрыемстве.
