Лінкі ўнівэрсальнага доступу

Расейскія алігархі баяцца дэфолту праз санкцыі ЗША, акцыі Rusal ужо ўпалі на 41 працэнт  


Расейскі мільярдэр Алег Дзерыпаска

Кампанія UC Rusal расейскага бізнэсоўца Алега Дзерыпаскі разьмясьціла на Ганконскай фондавай біржы паведамленьне, зь якога вынікае, што яна можа абвясьціць тэхнічны дэфолт з прычыны ўведзеных супраць яе санкцый ЗША.

Пасьля гэтага акцыі кампаніі ўпалі адразу на 41%, паведамляе агенцтва Reuters.

«Кампанія ацэньвае, што санкцыі Ўпраўленьня кантролю за замежнымі актывамі Міністэрства фінансаў ЗША могуць прывесьці да тэхнічнага дэфолту ў сувязі з пэўнымі крэдытнымі абавязаньнямі групы, — гаворыцца ў паведамленьні UC Rusal. — Цяпер мы ацэньваем верагодны ўплыў такіх тэхнічных дэфолтаў на фінансавае становішча. Кампанія падтрымлівае ўсе крэдытныя і фінансавыя абавязаньні, уключна з пагашэньнем доўгу. Мы працягнем сваю дзейнасьць у адпаведнасьці з прававымі і нарматыўнымі патрабаваньнямі».

Прынцыповае адрозьненьне новага пакету амэрыканскіх санкцый супраць Расеі палягае ў тым, што Вашынгтон упершыню унёс у чорны сьпіс прыватныя кампаніі. Абмежаваньні супраць мільярдэра Алега Дзерыпаскі і падкантрольных яму актываў сталіся настолькі шырокімі, што паўстае пытаньне наконт пэрспэктыў выжываньня ягонай бізнэс-імпэрыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG