Лінкі ўнівэрсальнага доступу

У Польшчы пачнецца суд за гандаль людзьмі. Пацярпелі некалькі тысячаў беларусаў і ўкраінцаў


Акруговая пракуратура Варшавы накіравала ў суд справу аб гандлі людзьмі. Двое абвінавачаных ад ліпеня 2015 да кастрычніка 2016 года наймалі беларусаў і ўкраінцаў на працу ў грамадзкім харчаваньні і ўтрымлівалі іх у рабскіх умовах.

Пра гэта піша сайт акруговай пракуратуры Варшавы. Як высьветліла пракуратура, Барыс С. і Міраслаў К. — арганізатары злачыннай схемы — карысталіся крытычным фінансавым становішчам людзей, вэрбавалі іх у Беларусі і Украіне, а затым прывозілі іх у Польшчу пад выглядам надзейнай і добрааплатнай працы.

Завэрбаваныя замежнікі, ня ведаючы як дзейнічаюць у Польшчы законы аб працаўладкаваньні, былі вымушаныя працаваць ва ўстановах грамадзкага харчаваньня ў Варшаве па 350 гадзінаў на месяц. Праз шматлікія «штрафы», заробак ім плацілі не своечасова і ня ў поўным аб’ёме. Пры гэтым людзі баяліся зьвяртацца ў праваахоўныя органы, баючыся страціць ужо заробленыя грошы.

На нанятых беларусаў і ўкраінцаў таксама аказвалі псыхалягічны ціск. Некаторых прымушалі падпісваць расьпіскі аб атрыманьні грошай у доўг, чым яшчэ больш заганялі ў фінансавую залежнасьць. Людзі жылі ў гатэлях для рабочых і на прыватных кватэрах на тэрыторыі Варшавы, арандаваных арганізатарамі злачынства. Жыльлёвыя ўмовы ў гэтых памяшканьнях сьледчыя назвалі «скандальнымі». Акрамя таго, іх жыцьцё было пад поўным кантролем гандляроў людзьмі.

Падазраваны, Барыс С., прызнаў цалкам віну і патлумачыў схему, па якой працавала арганізацыя. Ён пачаў працу ў рэстарацыі Міраслава К. у 2015 годзе спачатку як звычайны рабочы. Потым Міраслаў К. прапанаваў яму пасаду «наглядчыка» над іншымі рабочымі. Сам Міраслаў не прызнае віну.

Арганізатарам пагражае да 15 гадоў зьняволеньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG