Лінкі ўнівэрсальнага доступу

Памяткі пра БНР, першадрукара, жахі вайны і чары нэаготыкі — у навінках выдавецтва «Тэхналёгія»


Ілюстрацыйнае фота ©Shutterstock

У суботнім кніжным аглядзе Свабоды — навінкі менскага прыватнага выдавецтва «Тэхналёгія».

Валер Вядрэнка. Містэрыі Гервятаў. Фотаальбом

Валер Вядрэнка, адзін з самых выбітных сучасных беларускіх фотамастакоў, захапіўся паўночнай пярлінай беларускае нэаготыкі — касьцёлам Сьвятой Тройцы ў мястэчку Гервяты — амаль дваццаць гадоў таму. Сваё бачаньне стогадовага шэдэўру віленскага архітэктара Вацлава Міхневіча ён упершыню прэзэнтаваў публіцы ў Менску на выставе «Апосталы Гервятаў» у 2009 годзе.

Сваё захапленьне гервяцкай працай дойліда фатограф тады выказаў у адным з інтэрвію:

«Калі прыбраць гэты касьцёл, то пра вёску можна й не гаварыць. Сто гадоў таму там была такая ж забудова, магчыма, яшчэ больш несамавітая. Чалавек прыйшоў на пустое месца, і ў яго галаве нарадзілася ідэя такога памеру. Ён хадзіў, прыглядаўся, то бок — як гэты праект сьпеў. Наколькі выдатны й велічны гэты будынак, задума, і як яна сьпела. Паказаць гэты заклік да неба, Бога, які ідэальна ўвасоблены ў касьцельнай архітэктуры».

Праз год хараство гервяцкай сьвятыні ў інтэрпрэтацыі беларускага фотамастака пабачылі ў Познані.

У 2012-м Валер Вядрэнка наладзіў у Менску новую выставу сваіх фотавыяваў касьцёла Сьвятой Тройцы, якую назваў «Містэрыі Гервятаў». І вось цяпер выйшаў аднайменны фотаальбом, які, несумненна, адным падкажа маршруты новых падарожжаў да хараства айчыннага дойлідзтва, а для іншых стане цудоўным падарункам сабе і сябрам.

Албэрт Калныньш. 1941 год вачыма менскага мальца. Успаміны

Аўтар гэтае драматычна захапляльнае кнігі — заслужаны архітэктар Беларусі. Але на схіле веку яму захацелася падзяліцца зь людзьмі не расповедам пра шматлікія старонкі пасьпяховай творчай кар’еры, а ўспамінамі, далёкімі ад рамантыкі і натхненьня.

Яму было дванаццаць, калі ў Менск прыйшла вайна. Горад ператварыўся ў суцэльныя руіны і папялішчы. Ня маючы дзе жыць, пазбаўленыя сродкаў да існаваньня, дзеці разам з бацькам выправіліся ў Латвію, да родзічаў. На сваім шляху яны бачылі зычлівасьць і жорсткасьць, прыгажосьць і заняпад. Пра гэтае драматычнае падарожжа і апавядаецца ў кнізе.

Табэль-календары

​Сто гадоў бывае раз у жыцьці. І мала каму з сучасьнікаў пашчасьціць сустрэць наступнае стагодзьдзе лёсавызначальных падзеяў жыцьця краіны і нацыі. То варта захаваць памятку пра надзвычайныя сёлетнія даты.

100 гадоў з часу выданьня «Беларускай граматыкі» Браніслава Тарашкевіча.

100 гадоў Беларускай Народнай Рэспубліцы.

​Устаўная грамата

Рэпрынтнае выданьне для тых, хто заўсёды хоча мець перад вачыма галоўны дакумэнт, якім пачалася гісторыя Беларускай Народнай Рэспублікі. А таксама для тых, хто блытаецца ў датах пачатку незалежнасьці краіны.

Камплект паштовак «Ілюмінаваныя дрэварыты зь Бібліі Францішка Скарыны» ў абгортцы (10 шт.). На беларускай і ангельскай мовах

​Скарынавы гравюры ўпершыню выдадзеныя ў колерах. Камплект складаюць паштоўкі з наступнымі сюжэтамі: «Фараонава дачка знайшла хлопчыка Майсея ў вадзе», «Ісус Навін вядзе ізраілевых людзей церазь Ярдан», «Асілак Самсон разьдзірае льва на дарозе», «Рут, прабаба цара Давіда, зьбірае за жняцамі каласы», «Цар Давід іграе ў гусьлі, несучы ківот Гасподні», «Удавіца Юдыт адсякае галаву ваяводу Алафэрну», «Цар Салямон ставіць храм Госпаду Богу ў Ерусаліме», «Салямон гутарыць з царыцай Саваю», «Царыца Эстэр прыйшла да цара Асьвера», «Ерамія, прарок Гасподні, плача, гледзячы на Ерусалім».

Дзеля лепшай захаванасьці і наданьня сьвяточнага выгляду камплект паштовак у абгортцы запакаваны ў празрысты пакет, што асабліва ацэняць калекцыянэры.

Улічваючы распаўсюджаньне цяпер у моладзевым асяродзьдзі посткросінгу, выдаўцы даюць магчымасьць набываць паштоўкі і паасобку. Рассылаючы іх па ўсіх кантынэнтах, вы папулярызуеце ў шырокім сьвеце імя Францішка Скарыны, беларускую культуру і мову.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG