Нямецкая паліцыя пацьвердзіла затрыманьне былога лідэра Каталёніі Карласа Пудждэмона. Яго затрымалі паводле ордэру, выдадзенага Гішпаніяй, падчас перасячэньня дацка-нямецкай мяжы.
Сёньня раніцай стала вядома, што Пудждэмон пакінуў Фінляндыю, да таго як фінскія ўлады пасьпелі затрымаць яго па выпісаным у Гішпаніі ордэры, паведамляе ВВС.
Ордэр на арышт каталёнскага палітыка быў выпісаны ў пятніцу, на наступны дзень пасьля ягонага прыезду ў Хэльсынкі.
Пасьля рэфэрэндуму аб незалежнасьці, які прайшоў у Каталёніі і які Мадрыд прызнаў незаконным, Пудждэмон знаходзіўся ў Бэльгіі.
Сытуацыя ў Каталёніі па-ранейшаму застаецца напружанай. Парлямэнт Каталёніі адмовіўся ад плянаў назваць імя новага кіраўніка мясцовага ўраду пасьля таго, як быў арыштаваны папярэдні кандыдат.
Мінулай восеньню тысячы людзей у Каталёніі пратэставалі пасьля таго, як Вярхоўны суд Гішпаніі абвінаваціў 25 каталёнскіх палітыкаў, уключаючы Пудждэмона, які ўзначальваў урад аўтаноміі, у мецяжы і растраце шляхам арганізацыі рэфэрэндуму аб незалежнасьці ад Гішпаніі. Самі палітыкі віну не прызнаюць.
Абвінавачаным па найбольш цяжкіх артыкулах пагражае турэмнае зьняволеньне тэрмінам да 30 гадоў.
23 сакавіка ў выніку сутыкненьняў з паліцыяй у Барсэлёне пацярпелі больш за 20 чалавек. Дэманстрацыі прайшлі і ў іншых гарадах Каталёніі.
24 сакавіка Вярхоўны суд распарадзіўся на час разьбіральніцтва ўзяць пад варту бяз права на вызваленьне пад заклад пецярых ключавых каталёнскіх палітыкаў. Сярод іх — Жордзі Турул, які зьяўляўся кандыдатам на пасаду кіраўніка ўрада Каталёніі, вакантную зь лістапада 2017 году. Астатнія палітыкі на момант рашэньня суда ўжо былі арыштаваныя альбо беглі за мяжу.
