Кампанія Uber заяўляе аб прыпыненьні выпрабаваньняў бесьпілётных машын пасьля таго, як адбылося сьмяротнае дарожна-транспартнае здарэньне з удзелам такога аўтамабіля.
Аўтамабіль Uber быў у аўтаномным рэжыме, але ў машыне быў апэратар, калі аўто ажыцьцявіла наезд на жанчыну ў горадзе Тэмпе, штат Арызона, 18 сакавіка, паведамляе Bloomberg.
Паліцыя паведаміла, што 49-гадовая жанчына пераходзіла дарогу па-за пешаходным пераходам, калі адбыўся наезд. Яна памерла ў мясцовай бальніцы.
Генэральны дырэктар Uber Дара Хосуршахі выказаў спачуваньні ў Twitter і паведаміў, што кампанія, якая базуецца ў Сан-Францыска, супрацоўнічае зь мясцовымі праваахоўнымі органамі ў межах расьследаваньня здарэньня.
Кампаніі, уключаючы Ford і General Motors, у значнай меры інвэстуюць у дасьледаваньні, накіраваныя на распрацоўку бесьпілётных аўтамабіляў, пры ўдзеле якіх і раней адбываліся аварыі.
