Паводле інфармацыі, якую атрымаў каардынатар кампаніі «Праваабаронцы супраць сьмяротнага пакараньня ў Беларусі» Андрэй Палуда ад маці асуджанага да сьмяротнага пакараньня Кірыла Казачка, прысуд у дачыненьні да яе сына прыведзены ў выкананьне.
Пра гэта паведамляе Праваабарончы цэнтар «Вясна».
Паводле папярэдняй інфармацыі, Казачок быў расстраляны пры канцы кастрычніка 2017 году.
Міжнародная праваабарончая арганізацыя Amnesty International выступіла ў абарону Кірыла Казачка і распаўсюдзіла тэрміновы зварот да прэзыдэнта Лукашэнкі з заклікам спыніць сьмяротнае пакараньне ў Беларусі.
Забіў 9-гадовую дачку і 17-гадовага сына
Прысуд 39-гадоваму Кірылу Казачку быў абвешчаны 28 сьнежня 2016 году падчас выязнога пасяджэньня Гомельскага абласнога суду ў Мазыры. Судовыя слуханьні праходзілі ў закрытым рэжыме.
Забойства 9-гадовай Кіры і 17-гадовага Ўлада адбылося 31 студзеня 2016 году.
Пасьля забойства Кірыл Казачок прыехаў на найманую кватэру жонкі, дзе тая жыла са старэйшым сынам і сужыцелем, і расказаў ёй пра ўчыненае. Патэлефанаваў у міліцыю і скінуўся з балькона чацьвёртага паверху, але застаўся жывы. Доўгі час абвінавачваны правёў у шпіталі — у яго былі пашкоджаньні хрыбетніка і ног. Канцэнтрацыя сьпірту ў ягонай крыві ў той вечар склала 2,36 праміле.
Паводле дадзеных экспэртызы, абвінавачаны ў момант злачынства мог у поўнай меры ўсьведамляць значэньне сваіх дзеяньняў і кіраваць імі.
Як сьцьвярджае сьледзтва, жыхар Мазыра ўчыніў злачынства праз пачуцьцё помсты сваёй жонцы, якая намагалася скасаваць зь ім паўторны шлюб (раней яны ўжо разводзіліся, а затым зноў пажаніліся) і жыць асобна. У кастрычніку 2015 году жанчына падала дакумэнты на развод.
Жудасная трагедыя здарылася 31 студзеня 2016 году. Бацька, не задаволены працэсам скасаваньня шлюбу, зайшоў у пакой, дзе сын сядзеў каля кампутара, стукнуў яго малатком па галаве й задушыў. Тое самае ён зрабіў і з дачкою.
Кірыл Казачок адмовіўся абскарджваць прысуд у Вярхоўным судзе.