У Нямеччыне большасьць чальцоў Сацыял-дэмакратычнай партыі (СДПН) падтрымала ўступленьне ў так званую «вялікую кааліцыю» з хрысьціянскімі дэмакратамі канцлера Ангелы Мэркель.
Вынікі ўнутрыпартыйнага рэфэрэндуму былі абвешчаныя ў нядзелю раніцай. Каля двух трацін членаў СДПН прагаласавалі за ўступленьне ў кааліцыю. У галасаваньні ўдзельнічалі каля 380 тысяч чалавек.
Такім чынам, ужо ў найбліжэйшыя тыдні ў Нямеччыне можа быць сфармаваны новы кабінэт — больш чым праз паўгоду пасьля парлямэнцкіх выбараў.
Хрысьціянскія дэмакраты і сацыял-дэмакраты раней ужо дамовіліся аб асноўных парамэтрах новага кабінэту. Канцлерам застанецца Мэркель. Пасады міністраў замежных спраў і фінансаў зоймуць сацыял-дэмакраты.
СДПН, якая пацярпела на выбарах паразу, доўга адмаўлялася ад перамоваў аб кааліцыі з Мэркель, аднак яны ўсё ж пачаліся пасьля правалу спробаў хрысьціянскіх дэмакратаў сфармаваць кааліцыю з іншымі партыямі. Пасьля рашэньня кіраўніцтва сацыял-дэмакратаў пачаць перамовы папулярнасьць партыі, паводле апытаньняў, зьменшылася. Частка актыву партыі агітавала за сыход у апазыцыю, аднак кіраўніцтву ўдалося пераканаць большасьць чальцоў партыі зрабіцца часткай кааліцыі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў