Расея заблякавала рэзалюцыю Рады Бясьпекі ААН, якая асуджае Іран за парушэньне эмбарга пастаўкі зброі емэнскім паўстанцам хусітам.
Падчас галасаваньня ў панядзелак Расея наклала вэта на тэкст, складзены Вялікай Брытаніяй. Балівія падтрымала, устрымаліся дзьве краіны — Кітай і Казахстан, паведамляе «Голас Амэрыкі».
Рада Бясьпекі аднагалосна прыняла расейскую рэзалюцыю, якая падаўжае санкцыі супраць Емену на год і аднаўляе працу экспэртнай групы.
ЗША, Вялікая Брытанія і Францыя ўзначалілі намаганьні, накіраваныя на прыцягненьне Ірану да адказнасьці за меркаваную перадачу зброі хусітам у Емэне.
«Фармулёўка, высунутая ў брытанскім праекце, можа мець небясьпечныя, дэстабілізуючыя наступствы», — заявіў прадстаўнік Расеі Васіль Нябензя падчас паседжаньня. «Гэта непазьбежна прывядзе да абвастрэньня напружанасьці ў рэгіёне і да канфлікту паміж ключавымі рэгіянальнымі гульцамі», — папярэдзіў ён.
«Сёньняшняе вэта Расеі абараняе намаганьні Ірану, накіраваныя на дэстабілізацыю ў рэгіёне і распаўсюджваньне згубнага ўплыву», — заявіў прадстаўнік ЗША Кэлі Кэры пасьля таго, як рэзалюцыя Вялікай Брытаніі была заблякаваная.
У сваім апошнім дакладзе незалежная экспэртная група, якая сочыць за імплемэнтацыяй санкцый, прыйшла да высновы, што Іран ня змог прадухіліць перадачу зброі хусітам у Емэне. Група лічыць, што кааліцыя, якую ўзначальвае Саудаўская Арабія, перашкаджала дастаўцы гуманітарнай дапамогі, калі ўвяла паветраную і марскую блякаду. Нанясеньне авіяўдараў парушыла міжнароднае гуманітарнае права.
Вайна ў Емэне доўжыцца чатыры гады. Больш за 22 мільёнаў емэнцаў маюць патрэбу ў гуманітарнай дапамозе, у тым ліку больш за 8 мільёнаў чалавек, якім пагражае голад.
Арганізацыя Аб’яднаных Нацый неаднаразова заклікала бакі спыніць баявыя дзеяньні і забясьпечыць бясьпечны і неабмежаваны доступ да работнікаў гуманітарных арганізацый. Намаганьні па пошуку палітычнага рашэньня пакуль застапарыліся.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў