Лінкі ўнівэрсальнага доступу

Падымайце гантэлі і ежце больш бялку, асабліва калі вам за 40


Газэта The New York Times апублікавала артыкул пра сэнсацыйнае дасьледаваньне, якое тычылася сувязі паміж колькасьцю спажытых у ежу пратэінаў (бялкоў) і сілай і аб’ёмам мышцаў.

Выснова навукоўцаў простая — людзі, якія хочуць быць больш моцнымі, павінны займацца з гантэлямі і спажываць у ежу больш бялку. І асабліва гэта важна для тых, каму за 40. У іх выпадку эфэкт ад большай колькасьці спажытага бялку яшчэ большы.

Што мы ведалі раней

Паводле апошняга дасьледаваньня, на сілу і аб’ём мышц станоўчы ўплыў аказвае любы бялок — ялавічына, курыца, ёгурт і нават бабовыя культуры, такія як гарох ці фасоля.

Прафэсійныя культурысты даўно ведалі пра гэты эфэкт і спажывалі ў ежу ня толькі натуральны бялок у прадуктах, але і спэцыяльныя пратэінавыя дадаткі. Але для звычайных людзей перавагі павышанага спажываньня бялку ясныя не былі.

Ранейшыя дасьледаваньні паказвалі, што лепшы вынік сілавых трэніровак будзе ў тых людзей, якія павялічваюць спажываньня бялку ў параўнаньні з тымі, хто так ня робіць. Але ахоп ў тых дасьледаваньняў быў невялікі.

Новыя вынікі

У новым дасьледаваньні, вынікі якога былі апублікаваныя ў Брытанскім часопісе спартовай мэдыцыны (British Journal of Sports Medicine), былі аб’яднаныя дадзеныя старых і новых экспэрымэнтаў, зробленых навукоўцамі зь некалькіх амэрыканскіх унівэрсытэтаў.

Агулам былі ацэненыя вынікі 49 экспэрымэнтаў з удзелам 1863 чалавек, мужчын і жанчын. Колькасьць бялку, яго якасьць і час прыёму шырока вар’яваліся.

Мужчыны і жанчыны якія павялічылі спажываньне бялку падчас сілавых трэніровак, павялічылі аб’ём і сілу мышцаў больш чым тыя, хто гэтага не рабіў

Адказ быў вельмі адназначны. Мужчыны і жанчыны якія павялічылі спажываньне бялку падчас сілавых трэніровак, павялічылі аб’ём і сілу мышцаў больш чым тыя, хто гэтага не рабіў.

Разам з тым, узьдзеяньне дадатковай колькасьці бялку не было занадта вялікім. Практычна ўсе, хто рабіў сілавыя практыкаваньні, сталі мацнейшымі і павялічылі аб’ём мышцаў.

Але тыя, хто павялічыў спажываньне бялку, атрымалі 10 або больш працэнтаў дадатковай сілы і каля 25 працэнтаў мышачнай масы ў параўнаньні з кантрольнымі групамі.

Абноўленыя нормы

Спрыяльная норма для росту аб’ёму і сілы мышц, паводле новага дасьледаваньня, складае 1,6 грама чыстага бялку на 1 кіляграм вагі чалавека. Гэта 130 грамаў бялку для 80-кіляграмовага чалавека ў дзень.

Гэта значна больш, чым норма, якая дзейнічае ў тых жа Злучаных Штатах цяпер — 56 грамаў бялку ў дзень для мужчын і 46 грамаў бялку для жанчын.

Аўтары дасьледаваньня робяць адназначную выснову: у мэтах павелічэньня мышачнай сілы большасьць людзей мае патрэбу ў большай колькасьці бялку, чым тая, што цяпер рэкамэндуецца.

Пры гэтым, час і тып спажыванага бялку ня маюць значэньня.

  • 16x9 Image

    Сяргей Абламейка

    Сяргей Абламейка нарадзіўся ў Менску. Скончыў гістарычны факультэт БДУ. Працаваў сьлесарам на МАЗе, выкладаў гісторыю ў школе, быў навуковым супрацоўнікам Музэю народнай архітэктуры і побыту, пасьля Скарынаўскага цэнтру. На «Свабодзе» – зь верасьня 1990 году, з траўня 1995 году – у Празе. Пісьменьнік, гісторык, журналіст.

XS
SM
MD
LG