Лінкі ўнівэрсальнага доступу

Акцыя супраць будаўніцтва акумулятарнага заводу ў Берасьці не адбылася. Арганізатараў затрымалі напярэдадні


На плошчы Леніна а 12-й гадзіне сабралося ўсяго некалькі дзясяткаў чалавек, якія стаялі асобнымі групамі. Ніякіх лёзунзаў ніхто не агучваў.

Арганізатараў акцыі, блогераў Сяргея Пятрухіна і Аляксандра Кабанава, якія заклікалі выйсьці людзей на плошчу, не было.

Пазьней высьветлілася, што актывісты затрыманыя яшчэ ў суботу, 24 лютага. Яны знаходзяцца ў ІЧУ Ленінскага РАУС.

«За што яны затрыманыя і якім чынам адбывалася затрыманьне, нікому невядома, — распавёў Радыё Свабода Дзьмітрый Гарбуноў, — сябра Пятрухіна. — Вядома, што заўтра суд. Але больш ніякіх падрабязнасьцяў міліцыянты не паведамляюць».

Што да акцыі, то каля 30-40 чалавек, якія былі на галоўнай плошчы ў Берасьці, разышліся праз гадзіну.

А 13-й гадзіне на гэтым месцы распачаліся мерапрыемствы, якія ладзілі выратавальнікі.

«Прыкра, што агулам супраць будаўніцтва заводу падпісалася каля 40 тысяч чалавек, — кажа Дзьмітрый Гарбуноў, — а вось на плошчу нават і 1% ня выйшаў. Людзі моцна запалоханыя».

Ваша меркаваньне

Паказаць камэнтары

XS
SM
MD
LG