Лінкі ўнівэрсальнага доступу

Жыхара Рагачова, якому за адсутнасьць флікера зламалі рэбры, суд аштрафаваў другі раз


Віктар Арцюх

Судзьдзя Рагачоўскага раённага суду Аляксандар Крайнікаў прызнаў Віктара Арцюха вінаватым у непадпарадкаваньні міліцыянтам дэпартамэнту аховы і аштрафаваў яго на 2 базавыя велічыні — 49 рублёў.

«Канечне, будзем з адвакатам абскарджваць гэтую пастанову, бо яна не адпавядае рэчаіснасьці», — кажа Віктар Арцюх.

Паводле Віктара Арцюха, 17 студзеня яго спынілі на вуліцы міліцыянты за тое, што ня меў на сабе флікера. Калі Арцюх папрасіў іх прадставіцца і не пагадзіўся адразу сесьці ў машыну, да яго ўжылі сілу. Зьбіцьцё паўтарылася і ў машыне, і на ганку пастарунка. У выніку яму зламалі дзьве рабрыны. Арцюх заявіў, што біў яго міліцыянт Дзьмітры Літвінаў.

Жыхар Рагачова: за адсутнасьць флікера пабілі і зламалі рэбры, а цяпер аштрафавалі

Паводле рапарту Дзьмітрыя Літвінава, парушэньне Арцюха было ў тым, што ён ішоў па праезнай частцы Кастрычніцкай вуліцы; паводле рапарту ягонага напарніка Валера Кузькова — што пераходзіў у неналежным месцы вуліцу Лібкнэхта. Паводле самога Віктара Арцюха, ён пераходзіў Кастрычніцкую вуліцу. Сьведкі патлумачылі, што, у адрозьненьне ад вуліцы Лібкнэхта, на Кастрычніцкай гараць ліхтары.

На судзе высьветлілася, што відэа затрыманьня ў міліцыянтаў няма.

Літвінаў заявіў, што Арцюх называў іх «дурнымі людзьмі», якія не разьбіраюцца ў правілах дарожнага руху, і не хацеў сядаць у машыну.

«А яшчэ крычаў: „Міліцыя! Дапамажыце!“ Мы былі ў форменнай вопратцы. Мы што, не міліцыя, а бандыты якія?»

Паводле міліцыянтаў, Віктар Арцюх штурхаў іх, спрабуючы ўцячы, хапаў за форменную вопратку, а на прыступках каля дзяжурнай часткі ўхапіўся за парэнчы. Каб адарваць яго ад парэнчаў і начапіць кайданкі, Літвінаў вымушаны быў прымяніць сілавы прыём. Тады Арцюх паваліўся на прыступкі.

Раней, на пачатку лютага, начальнік Рагачоўскага аддзяленьня ДАІ аштрафаваў Віктара Арцюха за адсутнасьць флікера і парушэньне правілаў дарожнага руху на адну базавую велічыню. Штраф гэты ён аспрэчвае ў раённым судзе.

Віктар Арцюх паскардзіўся на дзеяньні міліцыянтаў у пракуратуру і Сьледчы камітэт.

Міліцыя прыйшла ў кватэру да рэдактара сайту, на якім зьявілася навіна пра жорсткае зьбіцьцё мужчыны бяз флікера

Ваша меркаваньне

Паказаць камэнтары

XS
SM
MD
LG