Лінкі ўнівэрсальнага доступу

Беларускія біятляністкі выйгралі алімпійскую эстафэту. Другое золата для зборнай Беларусі


Дар'я Домрачава зь сяброўкамі па камандзе пасьля фінішу

22 лютага беларуская каманда біятляністак змагалася за алімпійскія мэдалі ў эстафэце 4 на 6 кілямэтраў. Вынікам адладжанай працы стала золата Гульняў-2018.

Да пачатку гонкі фаварытамі называліся Нямеччына, Францыя і Італія. Беларусь разам зь вялікай групай камандаў прэтэндавала на трэцюю пазыцыю. Галоўнымі канкурэнткамі ў барацьбе за п’едэстал былі нарвэжкі, швэдкі, украінкі.

Беларуская чацьвёрка стартавала ў наступным парадку: Надзея Скардзіна, Ірына Крыўко, Дзінара Алімбекава і Дар’я Домрачава, якая ў Пхёнчхане ўжо стала срэбнай прызэркай у мас-старце. Пры дакладнай стральбе іх мэдалёвыя шанцы расцэньваліся як высокія.

Пасьля першага этапу настрой беларускіх заўзятараў быў ня самы лепшы — Надзея Скардзіна перадала эстафэту Ірыне Крыўко толькі дзясятай. Тая адчувальна палепшыла справы — была пятая на сваім рубяжы.

І ўжо сапраўдную сэнсацыю ўчыніла Дзінара Алімбекава, якая пры дакладнай стральбе забясьпечыла Дар’і Домрачавай трэцюю пазыцыю. Найлепшая беларуская біятляністка чыста прайшла першую палову і тройчы прамахнулася на другім этапе, скарыстаўшы запасныя патроны. Але гэтага хапіла для агульнай перамогі, Дар'я ўпэўнена абышла прадстаўніц Швэцыі і Францыі, якія падзялілі другое і трэцяе месцы.

За тры дні да заканчэньня Алімпійскіх гульняў у Пхёнчхане зборная Беларусі з двума золатамі і срэбрам займае 13-е месца ў агульнакамандным мэдалёвым заліку — пасярэдзіне сьпісу з трох дзясяткаў краін, чые прадстаўнікі станавіліся чэмпіёнамі і прызэрамі зімовых Гульняў-2018.

Сёньня з Паўднёвай Карэі ў Беларусь вярнуліся фрыстайлісты, у іх ліку і чэмпіёнка Пхёнчхану Ганна Гуськова. Пачынаючы ад 1998 году выхаванцы галоўнага трэнэра Мікалая Казекі стабільна здабываюць узнагароды, прычым тры апошнія Алімпіяды гэта мэдалі найвышэйшай вартасьці.

Ваша меркаваньне

Паказаць камэнтары

XS
SM
MD
LG