Вярхоўны суд Гішпаніі пакінуў у сіле прысуд рэпэру Хасэ Мігелю Арэнасу вядомаму пад артыстычным псэўданімам Вальтонік (Valtonyc). Ён быў асуджаны на тры з паловай гады турмы за тэксты сваіх песень.
Суд вырашыў, што ў тэкстах рэпэра з выспы Мальёрка, сярод іншага, утрымлівалася ўхвала тэрарыстычнай групоўкі ETA, а таксама паклёп і пагрозы на адрас каралеўскай сям’і і шэрагу гішпанскіх палітыкаў. Як піша гішпанская газэта El Pais, суд у сваім рашэньні падкрэсьліў, што ў песьнях Valtonyc «ухваляюцца ня толькі палітычныя мэты, але таксама і гвалтоўныя сродкі, якімі карыстаюцца тэрарыстычныя арганізацыі».
Адвакаты Арэнаса заявілі, што будуць абскарджваць прысуд у Канстытуцыйны суд Гішпаніі, бо парушанае права іх кліента на свабоду выказваньня.