Лінкі ўнівэрсальнага доступу

Прэс-цэнтар кампаніі назіраньня «Права выбару-2018» спыніў эфір, яго прадстаўнікоў змушаюць пакінуць памяшканьне


Прадстаўнікоў кампаніі «Права Выбару» зьмушаюць пакінуць памяшканьне культурнага цэнтру «Корпус» (вул. Машэрава, 9), дзе 18 лютага была арганізаваная праца прэс-цэнтру па назіраньні за мясцовымі выбарамі.

Пра гэта праз паўгадзіны пасьля пачатку трансьляцыі працы прэс-цэнтру ў інтэрнэце паведаміў прэс-сакратар кампаніі Ігар Барысаў.

«Па незалежных прычынах мусім спыніць эфір у гэтым памяшканьні. Спадзяемся ў хуткім часе працягнуць зь іншага памяшканьня», — напісаў Ігар Барысаў у сацыяльных сетках.

Ён паведаміў БелаПАН, што кіраўніцтву «Корпус», а таксама арганізацыі, у якой цэнтар арандуе памяшканьне, пачалі паступаць званкі «зьверху» з патрабаваньнем спыніць трансьляцыю і пакінуць памяшканьне.

«Адбываецца беспрэцэдэнтны ціск на нас і на адміністрацыю цэнтру, тэлефоны проста разрываюцца», — сказаў Барысаў.

У цяперашні час прадстаўнікі «Права выбару» шукаюць новае памяшканьне для арганізацыі працы прэс-цэнтру.

У кампанію назіраньня «Права Выбару» уваходзяць восем дэмакратычных грамадзкіх і палітычных арганізацыяў: Аб’яднаная грамадзянская партыя, Беларуская партыя «Зялёныя», Партыя БНФ, Беларуская сацыял-дэмакратычная партыя (Грамада), рух «За Свабоду», аргкамітэты па стварэньні партыі «Беларуская хрысьціянская дэмакратыя» і Партыі свабоды і прагрэсу, прафсаюз РЭП.

18 лютага, у асноўны дзень галасаваньня на выбарах дэпутатаў мясцовых саветаў, прадстаўнікі кампаніі зьбіраліся працаваць увесь дзень, з 8.00 да 21.30. Плянаваліся, у прыватнасьці, дыскусіі на тэму выбараў, абмеркаваньне фактаў парушэньняў на розных этапах выбарчай кампаніі, прэс-канфэрэнцыі палітыкаў і назіральнікаў. Працу прэс-цэнтру меркавалася шырока асьвятляць у інтэрнэце. На 12.30 19 лютага ў цэнтры «Корпус» была прызначаная прэс-канфэрэнцыя па выніках выбараў.

Ваша меркаваньне

Паказаць камэнтары

XS
SM
MD
LG