Лінкі ўнівэрсальнага доступу

Турэцкі прэм’ер упершыню прыехаў у Менск. Беларускі экспарт прадуктаў вырас у 100 разоў


Архіўнае фота. Прэзыдэнт Беларусі Аляксандар Лукашэнка і прэзыдэнт Турэччыны Рэджэп Эрдаган падчас сустрэчы ў Стамбуле. Стамбул, 13 красавіка 2016 году

Аляксандар Лукашэнка ​сустрэўся сёньня ў Менску з прэм’ерам-міністрам Турэччыны Біналі Йылдырымам. Гэта першы ў гісторыі візыт турэцкага прэм’ера ў Беларусь, піша БЕЛТА.

Падчас сустрэчы Лукашэнка заявіў, што асноўныя міністэрствы і ведамствы дзьвюх краінаў наладзілі «шчыльнае і плённае супрацоўніцтва», беларуска-турэцкія адносіны «перажываюць нейкі пэрыяд рэнэсансу», а таваразварот паміж краінамі наблізіўся да 1 млрд даляраў, і гэта «толькі база для далейшага разьвіцця двухбаковых адносінаў».

Лукашэнка заклікаў да нарошчваньня актыўнага беларуска-турэцкага супрацоўніцтва па ўсіх напрамках.

Кіраўнік турэцкага ўраду Біналі Йылдырым таксама адзначыў, што прэзыдэнт Турэччыны Рэджэп Эрдаран задаволены беларуска-турэцкімі адносінамі, але лічыць, што «мы недастаткова выкарыстоўваем патэнцыял і маем магчымасьці для разьвіцця супрацоўніцтва».

Прэм'ер-міністар Турэччыны ўпершыню зьдзяйсьняе візыт у Беларусь.

Напярэдадні адбыліся ягоныя перамовы з прэм’ер-міністрам Андрэем Кабяковым, па выніках якіх бакі падпісалі пакет дакумэнтаў па пашырэньні супрацоўніцтва ў розных сфэрах.

Прэм’ер-міністар Турэччыны таксама правёў сустрэчу са старшынёй Савета Рэспублікі Міхаілам Мясьніковічам і старшынёй Палаты прадстаўнікоў Уладзімерам Андрэйчанкам. Акрамя таго, праграма візыту Біналі Йылдырыма прадугледжвае ягоны ўдзел у адкрыцьці Беларуска-турэцкага дзелавога форуму, наведваньне Менскага заводу колавых цягачоў і Кітайска-беларускага індустрыяльнага парку «Вялікі камень».

Беларусь павялічыла экспарт прадуктаў у Турэччыну ў 100 разоў

Пра рэзкае павелічэньне экспарту беларускіх прадуктаў у Турэччыну паведаміў сёньня журналістам начальнік галоўнага ўпраўленьня замежнаэканамічнай дзейнасьці Міністэрства сельскай гаспадаркі і харчаваньня Аляксей Багданаў перад пачаткам Беларуска-турэцкага бізнэс-форуму, паведаміла БЕЛТА.

Паводле яго, экспарт прадпрыемстваў сыстэмы Мінсельгасхарчу ў Турэччыну за мінулы год вырас практычна ў 100 разоў і склаў 10,8 млн даляраў. У асноўным пастаўлялася масла (90% усяго экспарту), сухое натуральнае малако, сыры і тварог, а таксама яйкі.

Багданаў патлумачыў гэта тым, што мінулы год прайшоў пад знакам дэфіцыту прадукцыі тлушчавай групы, а менавіта масла — кошты на яго вырасьлі ва ўсім сьвеце.

Начальнік галоўнага ўпраўленьня ЗЭД сказаў, што ў далейшым беларускі бок плянуе зрабіць упор на экспарт у Турэччыну беларускіх сыроў.

«Калі там пачнецца сэзон, мы хочам, каб беларускія сыры былі прадстаўленыя ў многіх гатэлях гэтай краіны», — распавёў чыноўнік.

Беларускі экспарт у Турэччыну ў 2017 годзе дасягнуў 134,4 млн даляраў

Паводле афіцыйных дадзеных, Турэччына займае дзявятае месца па аб’ёме таваразвароту ў зьнешнім гандлі Беларусі. У 2017 годзе паказьнікі ўзаемнага гандлю перавысілі 940 млн даляраў. Пры гэтым беларускі экспарт павялічыўся практычна на 60% у параўнаньні з 2016 годам і дасягнуў 134,4 млн даляраў. Беларусь пастаўляе ў Турэччыну калійныя угнаеньні, сталёвыя паўфабрыкаты, нафтахімію, сынтэтычныя валокны і ніткі, сельскагаспадарчыя тавары.

Па выніках дзевяці месяцаў 2017 году аб’ём турэцкіх інвэстыцыяў у беларускую эканоміку склаў 40,4 млн даляраў (165,6% да аналягічнага пэрыяду 2016 года-га). У Беларусі працуюць каля 300 суб’ектаў гаспадараньня з турэцкім капіталам.

У Турэччыне дзейнічае адзін прамы суб’ект беларускай тавараправоднай сеткі — ТАА «BNH Petrokimya», заснаваны прадпрыемствамі канцэрну «Белнафтахім». У сьнежні 2016 году адкрытае прадстаўніцтва Менскага аўтамабільнага заводу, вядзецца праца дзеля стварэньні зборачных вытворчасьцяў камбайнаў «Гомсельмаш», будаўнічай і спэцыяльнай тэхнікі «Амкадор», а таксама паставак на турэцкі рынак тэхнікі БелАЗ.

Ваша меркаваньне

Паказаць камэнтары

XS
SM
MD
LG