Лінкі ўнівэрсальнага доступу

Сяброўка экс-прэзыдэнта Паўднёвай Карэі атрымала 20 гадоў турмы


Чхвэ Сун Сіль пасьля абвяшчэньня прысуду, 13 лютага 2018 году.

Суд у Сэуле асудзіў сяброўку былога прэзыдэнта Паўднёвай Карэі да 20 гадоў турмы. Чхвэ Сун Сіль прызналі вінаватай у карупцыі і ва ўмяшаньні ў палітычныя справы краіны. Акрамя таго, яна павінна будзе выплаціць штраф памерам 16,5 мільёна даляраў.

Чхвэ Сун Сіль некалькі гадоў была дарадцам экс-прэзыдэнта Паўднёвай Карэі Пак Кын Хэ. Два гады таму яны абедзьве апынуўся ў цэнтры палітычнага скандалу. Паводле дадзеных сьледзтва, Чхвэ Сун Сіль выкарыстоўвала свой уплыў, каб прымусіць буйныя карпарацыі рабіць ахвяраваньні ў зьвязаныя зь ёй фонды.

Былая кіраўніца Паўднёвай Карэі Пак Кын Хэ была адхіленая ад улады праз працэдуру імпічмэнту ў сярэдзіне сакавіка 2017 году. Яе арыштавалі паводле абвінавачваньня ў карупцыі, перавышэньні паўнамоцтваў і разгалошваньні дзяржаўнай таямніцы.

У пачатку студзеня агенцтва Associated Press паведаміла, што Пак Кын Хэ падазраюць у незаконным атрыманьні больш 3 мільёнаў даляраў ад трох былых кіраўнікоў спэцслужбаў краіны.

Сьцьвярджаецца, што экс-прэзыдэнтка выкарыстала гэтыя грошы на свае асабістыя патрэбы, уключаючы падтрымку бізнэсу сваёй сяброўкі, а таксама на не прадугледжаныя законам ўзнагароджаньні для сваіх памочнікаў.

XS
SM
MD
LG