Лінкі ўнівэрсальнага доступу

Пацярпелыя ў Галакосьце ўварваліся ў польскую амбасаду ў Тэль-Авіве


Некалькі дзясяткаў чалавек, пацярпелых падчас Галакосту, ​уварваліся ў чацьвер на тэрыторыю польскай амбасады ў Тэль-Авіве, пратэстуючы супраць польскага «закону аб Галакосьце». Многія зь іх абвінавачвалі Польшчу ў перасьледзе.

Як паведамляе партал The Times of Israel, дэманстрацыю арганізаваў фонд Yad Ezer La-Haver, які мае цэнтар апекі для ацалелых у Галакосьце ў Хайфе.

— Мы тут, каб выказаць наш пратэст, і абяцаем, што ціха ня будзе, — сказаў дырэктар фонду Шымон Сабаг.

Дэманстранты спачатку пратэставалі па-за будынкам пасольства, але потым уварваліся на яго тэрыторыю. Ахова ня здолела ім перашкодзіць.


Людзі трымалі транспаранты «Ніякі закон ня можа сьцерці гісторыю», «Польскі закон плюе ў твар народу Ізраілю». Жанчына сталага ўзросту трымала плякат з надпісам «Я ўсё яшчэ маю кашмары праз тое, што зрабілі мне палякі».

Дэманстранты атачылі аўтамабіль аднаго з польскіх дыпляматаў, які спрабаваў выехаць з аб’екту. «Ніхто не забудзе таго, што ты зрабіў», — крычалі ўдзельнікі пратэсту. Яны заявілі, што не зьбіраюцца пакідаць амбасаду і паставяць перад ёю намёт.

Нагодай скандалу ў польска-габрэйскіх стасунках стаў законапраект, прыняты польскім Сэймам. Ён прадугледжвае крымінальны перасьлед тых, хто прыпісвае палякам злачынствы нацыстаў, у прыватнасьці, ужывае словазлучэньне «польскія лягеры сьмерці».

Гэтая частка зьменаў у закон абурыла Ізраіль. Прэм’ер-міністар Ізраілю Біньямін Нэтаньягу назваў закон «неабгрунтаваным», а Сусьветны цэнтар памяці ахвяраў Галакосту заявіў, што польскія заканадаўчыя зьмены могуць «прывесьці да размываньня гістарычнай праўды аб дапамозе, якую немцы атрымалі ад польскага насельніцтва падчас Галакосту».

Ваша меркаваньне

Паказаць камэнтары

XS
SM
MD
LG