Лінкі ўнівэрсальнага доступу

У ЗША мяркуюць, што Расея «пасьпяхова пракралася» у выбарчыя сыстэмы некаторых штатаў


Пра гэта заявіла высокапастаўленая чыноўніца міністэрства ўнутранай бясьпекі ЗША Джанэт Манфры.

Манфры сказала ў сераду, што Расеі ўдалося «пасьпяхова пракрасьціся» у сыстэмы рэгістрацыі выбаршчыкаў у невялікай колькасьці штатаў ў 2016 годзе.

Джанэт Манфры, якая адказвае за пытаньні кібэрнэтычнай бясьпекі ў міністэрстве ўнутранай бясьпекі ЗША, заявіла каналу NBC News, што мэтамі Расеі стаў 21 штат, і што «ў вельмі малой колькасьці зь іх» сапраўды адбылося пранікненьне.

Раней стала вядома, што хакеры праніклі ў сыстэмы рэгістрацыі выбаршчыкаў у Арызоне і Ілінойсе. Шэраг іншых штатаў, уключаючы Алабаму, Каліфорнію, Каларада, Вісконсін і Флорыду, пацьвердзілі, што яны падвяргаліся нападам.

Афіцыйныя асобы паведамілі NBC, што няма ніякіх сьведчаньняў, што ў сьпісы выбаршчыкаў ўносіліся якія-небудзь зьмены.

На думку амэрыканскай разьведвальнай супольнасьці, гэтыя крокі былі часткаю больш шырокіх намаганьняў Масквы для ўмяшаньня ў прэзыдэнцкія выбары ў ЗША.

Ваша меркаваньне

Паказаць камэнтары

XS
SM
MD
LG