На судзе па абвінавачваньні ў дзяржаўнай здрадзе экс-прэзыдэнта Ўкраіны Віктара Януковіча дапыталі адмірала Ігара Ценюха, які займаў пасаду выканаўцы абавязкаў міністра абароны Ўкраіны ў пачатку анэксіі.
Калі Расея пачала перакідаць свае войскі, тагачасны начальнік Генштабу ВСУ Юры Ільлін, які быў «чалавекам Януковіча», аддаў загад не прыводзіць ВМС Украіны ў баявую гатовасьць, распавёў Ценюх.
У лютым-сакавік 2014 Ігара Ценюха ўжо прызначылі выканаўцам абавязкаў міністра абароны. Ён кажа, што перш за ўсё правёў навучаньне, прывёў войскі ў гатовасьць і перагрупаваў іх, у залежнасьці ад дысьлякацыі расейскіх «зялёных чалавечкаў».
На пасяджэньні Рады нацыянальнай бясьпекі і абароны Ўкраіны 28 лютага 2014 Ценюх выступаў за маштабную ваенную апэрацыю. Аднак супраць гэтага была Юлія Цімашэнка, якая тады нават ня мела дзяржаўнай пасады, а была палітыкам, нядаўна звольненым з-за кратаў. У пратаколе яго допыту таксама гаворыцца пра тое, што такога ж меркаваньня прытрымліваліся тагачасны кіраўнік Адміністрацыі прэзыдэнта, а цяпер кіраўнік абарончага камітэту Вярхоўнай Рады Сяргей Пашынскі, а таксама былы кіраўнік Нацгвардыі Ўкраіны, а цяпер міністар абароны Сьцяпан Палтарак.
Ад пачатку 2014 году ва Ўкраіне працягваецца дыскусія пра тое, ці трэба было сілай абараняць Крым.
