Парлямэнт Таджыкістану ўхваліў закон, які зьніжае ўзроставы цэнз для кандыдатаў у прэзыдэнты — з 35 да 30 гадоў. Экспэрты мяркуюць, што мэта паправак — даць магчымасьць вылучыць сваю кандыдатуру на пасаду кіраўніка дзяржавы старэйшаму сыну прэзыдэнта Рахмона, Рустаму Эмамалі.
У 2018 годзе Рустаму Эмамалі споўніцца 31 год, а яго бацьку ўжо 65. Таджыкістан у якасьці прэзыдэнта Эмамалі Рахмон узначальвае ад 1994 году, а да гэтага яшчэ два гады кіраваў Вярхоўным саветам краіны.
У краіне ўжо даўно кажуць пра падрыхтоўку прэзыдэнтам перадачы ўлады сыну. У 2016 годзе ў Канстытуцыю была ўнесеная папраўка пра ўзрост кандыдатаў у прэзыдэнты, якую прыняты 7 лютага закон па сутнасьці дублюе.
У студзені 2017 году Рустама Эмамалі прызначылі генэралам і мэрам Душанбэ. Ён стаў самым маладым мэрам сталіцы ў краінах СНД.
Да гэтага, пачынаючы з 26 гадоў, ён узначальваў спачатку мытню Таджыкістану, а потым — мясцовую футбольную фэдэрацыю і выступаў галоўным змагаром з карупцыяй.
Акрамя папраўкі пра ўзрост кандыдата, у закон «Аб выбарах прэзыдэнта і парлямэнту» Таджыкістану ўнесеныя яшчэ некалькі зьмен.
