Пра гэта заявіў афіцыйны прадстаўнік ірацкага ўраду 5 лютага. Саад аль-Хадзіці паведаміў, што бітва супраць джыхадыстаў скончылася «і таму ўзровень амэрыканскай прысутнасьці будзе зьменшаны».
Аль-Хадзіці падкрэсьліў, што вывад войскаў усё яшчэ знаходзіцца на раньняй стадыі і ў цяперашні час не азначае поўнага вываду войскаў ЗША. Гэта заява пацьвярджаецца паведамленьнямі заходніх кантрактараў на базе кааліцыйных войскаў пад кіраўніцтвам ЗША ў Іраку, якія таксама заявілі, што войскі ЗША пачалі выводзіцца. У паведамленьнях гаворыцца, што вайскоўцы ЗША, зброя і абсталяваньне перавозяцца зь Іраку ў Аўганістан.
Злучаныя Штаты ўпершыню пачалі наносіць бомбавыя ўдары па сілах «Ісламскай дзяржавы» у Іраку ў жніўні 2014 году, а ў наступныя гады ўшчыльную падтрымлівалі ваенныя дзеяньні супраць ІД урадавых войскаў Іраку.
У дакладзе Пэнтагону, апублікаваным у лістападзе летась, гаворыцца, што ў канцы верасьня ў Іраку налічвалася 8900 вайскоўцаў ЗША.
