Згодна з распараджэньнем, пазачарговыя прэзыдэнцкія выбары прызначаныя на 11 красавіка 2018 году.
Цэнтральнай выбарчай камісіі Азэрбайджану даручана забясьпечыць у адпаведнасьці з Выбарчым кодэксам правядзеньне прэзыдэнцкіх выбараў.
Галасаваньне павінна было прайсьці ў кастрычніку 2018 году. З чым зьвязаны перанос выбараў, у заяве прэзыдэнта краіны не паведамляецца.
Аліеў — кандыдат у прэзыдэнты Азэрбайджану ад кіруючай партыі.
У 2016 годзе ў Азербайджане прайшоў рэфэрэндум аб унясеньні зьмяненьняў у Канстытуцыю. Усяго ў галоўны дакумэнт краіны ўнесьлі 29 паправак.
Сярод зьмен — падаўжэньне тэрміну прэзыдэнцкіх паўнамоцтваў з пяці да сямі гадоў. Цяперашні кіраўнік краіны, 54-гадовы Аліеў, займае пасаду прэзыдэнта з 2003 году, пераняўшы яго ў хворага бацьку, і ўжо тройчы перамагаў на прэзыдэнцкіх выбарах (у 2003-м, 2008- м і 2013 гг.) Яго цяперашні прэзыдэнцкі тэрмін павінен скончыцца ў 2018 годзе.
Паводле іншай папраўцы, у краіне стварылі дзьве віцэ-прэзыдэнцкія пасады. Абодва віцэ-прэзыдэнты будуць прызначацца і звальняцца прэзыдэнтам, а першы віцэ-прэзыдэнт стане другім чалавекам у краіне. У выпадку, калі прэзыдэнт будзе ня ў стане выконваць свае абавязкі, менавіта да яго (або яе), а не да прэм’ер-міністра, якога прызначае парлямэнт, пяройдуць прэзыдэнцкія паўнамоцтвы.
У 2017 годзе Аліеў прызначыў сваю жонку, дэпутата Мэджліса Мехрыбан Аліеву, першым віцэ-прэзыдэнтам Азэрбайджану.