ФБР абвінавачвае праграміста Пятра Левашова ва ўзломе мільёнаў кампутараў па ўсім сьвеце.
Нацыянальная паліцыя Гішпаніі паведаміла, што расейскі праграміст Пётр Левашоў, затрыманы ў гэтай краіне на запыт ЗША, быў перададзены прадстаўнікам амэрыканскай Службы фэдэральных маршалаў і бліжэйшым часам будзе экстрадаваны ў Злучаныя Штаты.
Левашова затрымалі ў Барсэлёне 7 красавіка летась. Паводле дадзеных ФБР, менавіта ён стварыў і кіраваў сеткай Kelihos, у якую ўваходзілі некалькі мільёнаў заражаных кампутараў па ўсім сьвеце.
Амерыканскія ўлады сьцьвярджаюць, што праграміст браў з заказчыкаў ад 200 да 500 даляраў за рассылку 1 мільёна паведамленьняў з рэклямай розных тавараў.
У рэйтынгу эўрапейскай дасьледчай арганізацыі Spamhaus, якая аналізуе інфармацыю пра хакераў ва ўсім сьвеце, Левашоў займае сёмае месца, і вядомы пад імем «кароль спаму».