Нацыянальны банк плянуе ў бліжэйшай пэрспэктыве адмяніць неабходнасьць атрыманьня фізычнымі асобамі дазволаў на адкрыцьцё рахункаў за мяжой.
Пра гэта гаварылася 31 студзеня на пашыраным пасяджэньні праўленьня Нацбанку, дзе абмяркоўвалася грашова-крэдытная палітыка ў гэтым годзе.
Таксама Нацбанк зьбіраецца рэалізаваць пераход ад дазвольнага парадку правядзеньня асобных валютных апэрацый руху капіталу да рэгістрацыйнага і цалкам адмяніць абавязковы продаж валютнай выручкі.
Ужо падрыхтаваныя і праходзяць узгадненьне шэраг зьменаў у адпаведныя прэзыдэнцкія ўказы, а таксама ў Грамадзянскі і Банкаўскі кодэксы.
Паводле Нацбанку, новыя меры па ўдасканаленьні валютнага заканадаўства павінны скасаваць бар’еры і залішнія адміністрацыйныя працэдуры пры вядзеньні бізнэсу, якія існуюць цяпер, а таксама захаваць стабільнасьць нацыянальнай валюты.
Нацбанк паведамляе, што сумесна з урадам працягне працу дзеля таго, каб выключыць выкарыстаньне замежнай валюты ў разьліках на тэрыторыі Беларусі, а таксама пры фармаваньні цэнаў, ставак пошлін і іншых плацяжоў. Ключавыя этапы дэдалярызацыі эканомікі плянуецца завяршыць да канца 2018 году.
