Як расказвала Свабода, летась у канцы кастрычніка каля аднаго з дамоў на вуліцы Мэдыцынскай маці з 15-гадовай дачкой сарвалі з клюмбы засохлыя кветкі, каб зрабіць букет. Жанчына — прафэсійная флярыстка.
Аднак у працэсе збору ля пад'езду зьявілася жыхарка першага паверху, якая абурылася, што трэба было запытаць дазволу, бо кветкі высадзілі яна разам з суседкай. Пры гэтым размову запісала на відэа, а рэчавы доказ адправіла ў міліцыю.
Кошт «скрадзеных кветак» гаспадыня ацаніла ў 30 рублёў. Ніводзін з бакоў канфлікту пайсьці на міравую не захацеў.
Пасьля праверкі матэрыялы з пракуратуры Віцебску паступілі ў сьледзтва. Сьледчы камітэт пачаў крымінальную справу па факце «рабаваньня, учыненага групай асобаў». Згодна з ч. 2 арт. 206 Крымінальнага кодэксу, за падобнае злачынства прадугледжана да 6 гадоў зьняволеньня.
Справа набыла шырокі грамадзкі розгалас, і ў сьнежні 2017-га крымінальны перасьлед у дачыненьні жанчыны і яе дачкі спынілі праз «малазначнасьць правапарушэньня». Справа мусіла скончыцца адміністрацыйным пакараньнем.
Аднак у студзені галоўнай фігурантцы паведамілі, што папярэдняе сьледзтва адноўлена.