Лінкі ўнівэрсальнага доступу

На Гаваях памылкова была абвешчаная трывога ў сувязі з «ракетным нападам»


Памылковы сыгнал «трывогі» быў распаўсюджаны ў суботу на тэрыторыі штату Гаваі. Надзвычайныя службы неадкладна перадалі паведамленьне, што трывога — памылковая, падкрэсьліўшы, што няма ніякай ракеты, што набліжаецца да тэрыторыі Гавайскіх выспаў.

На ўсе мабільныя тэлефоны жыхароў Гаваяў было разасланае смс-паведамленьне: «Да Гавайскіх выспаў набліжаюцца балістычныя ракеты. У вас ёсьць 15 хвілін для таго, каб схавацца».

Спэцыялісты вывучаюць акалічнасьці ўзьнікненьня памылковага сыгналу. Камэнтатары адзначаюць, што для падлёту паўночнакарэйскіх ракет да Гавайскіх выспаў спатрэбілася б 20 хвілін.

Афіцыйныя прадстаўнікі ў інтэрвію амэрыканскім СМІ паведамляюць, што на Гавайскіх выспах няма супрацьатамных сховішчаў.

Калі б сапраўды адбываліся вучэньні, то, як падкрэсьліваюць амэрыканскія вайсковыя экспэрты, паслаць вучэбны сыгнал трывогі і атрымаць такі сыгнал упаўнаважаныя толькі некалькі чалавек.

На дадзены момант ніхто ня можа назваць канкрэтнага меркаванага віноўніка інцыдэнту.

Насельніцтва Гавайскіх выспаў складае паўтара мільёна чалавек. Астравы сталі 50-м амэрыканскім штатам у жніўні 1959 году. Гавайскія выспы разьмешчаныя ў цэнтральнай частцы Ціхага акіяну ў Паўночным паўшар’і на адлегласьці 3700 кілямэтраў ад кантынэнтальнай часткі ЗША.

XS
SM
MD
LG