Іранскі прэзыдэнт таксама прызнаў, што людзей непакоіць ня толькі эканамічная сытуацыя, але і праблемы з карупцыяй і празрыстасьцю ўраду.
Улады Ірану ў нядзелю папярэдзілі пра магчымыя рэпрэсіі супраць удзельнікаў дэманстрацый, якія сталі адной з самых сур’ёзных праблем як для ўраду, гэтак і для клерыкальнага кіраўніцтва з часоў Іранскай рэвалюцыі 1979 году. Дзясяткі тысяч іранцаў пратэстуюць па ўсёй краіне з чацьвярга супраць кіраўніцтва Ісламскай Рэспублікі і супраць зьнешняй палітыкі Ірану. Пратэстоўцы таксама скандавалі лёзунгі ў падтрымку палітычных зьняволеных. Падчас дэманстрацый два чалавекі былі забітыя і дзесяткі арыштаваныя.
Першапачаткова дэманстранты выказвалі абурэньне з нагоды эканамічных цяжкасьцяў і карупцыі, але затым сталі патрабаваць адстаўкі вярхоўнага лідэра Ірану, аяталы Алі Хамэнэі. На відэа, разьмешчаных у сацыяльных сетках, чуваць, што людзі скандуюць: «Мулы, майце сорам, пакіньце краіну ў спакоі!» Дэманстранты таксама выкрыквалі: «Няхай жыве Рэза Шах!»
Такія заклікі сьведчаць аб беспрэцэдэнтным узроўні гневу і парушаюць даўнія табу, устаноўленыя ў краіне. Дынастыя шахаў Пэхлеві кіравала Іранам з 1925 году і была зрынутая ў выніку рэвалюцыі ў 1979 годзе, калі лідэрам Ісламскай Рэспублікі стаў аятала Рухала Хамэйні.
У Іране абмежаваны доступ да папулярных прыкладаньняў для абмену фатаграфіямі і паведамленьнямі на мабільных тэлефонах — Instagram і Telegram. Паводле паведамленьняў інфармацыйнага агенцтва ISNA і іншых сродкаў масавай інфармацыі, упачатку дня ў нядзелю быў абмежаваны доступ да Telegram, які ўрад Ірану абвінаваціў у тым, што яго выкарыстоўваюць для распальваньня гвалту падчас пратэстаў. Міністар сувязі Ірану Мухамад-Джавад Азары Джахрамі абвінаваціў Telegram, што ён «контрарэвалюцыйны» і заахвочвае «выкарыстаньне кактэйляў Молатава, збройны чын і сацыяльныя беспарадкі».
