Лінкі ўнівэрсальнага доступу

У Маскве страляніна на фабрыцы «Меньшевик». Адзін чалавек забіты, трое параненыя


На паўднёвым усходзе Масквы на тэрыторыі кандытарскай фабрыкі «Меньшевик» невядомы мужчына адкрыў агонь, як мінімум адзін чалавек загінуў, яшчэ трое атрымалі раненьні. У паліцыі мяркуюць, што нападнік трымае закладнікаў.

Паводле інфармацыі агенцтва ТАСС, агонь на фабрыцы адкрыў былы ўласьнік, яго прозьвішча не называецца.

«Паводле папярэдніх зьвестак, былы ўласьнік прыйшоў на фабрыку. Застрэліў ахоўніка і цяпер ходзіць па тэрыторыі прадпрыемства са зброяй і страляе», — сказала крыніца ТАСС.

Расейскай радыёстанцыі «Бизнес ФМ» удалося зьвязацца з Іванам Авяр’янавым, які распавёў, што сапраўды забарыкадаваўся на тэрыторыі прадпрыемства. Ён называе сябе дырэктарам фабрыкі «Меньшевик».

«Я — дырэктар. Я цяпер тут сяджу, забарыкадаваўся. Карацей кажучы, банда каўкаская, асэтынская на чале з двума пракурорамі... У мяне па падробленых дакумэнтах адабралі фабрыку, разарылі мяне. У мяне восем дзяцей. Вы ведаеце, я чатыры гады бʼюся. Яны ўсё перакупляюць, падрабляюць дакумэнты, па падробленых дакумэнтах адсуджваюць. Сёньня раніцай я прыйшоў на працу, мяне сталі браць штурмам — зь пісталетамі, са зброяй. Я маю штатную зброю, я сёньня ўжыў абарону. Аднаго застрэліў, па-мойму, да сьмерці, на жаль. Вось такая вось гісторыя. Калі застануся жывы, буду біцца да канца. Цяпер мяне ўжо акружылі там, спэцназ атачыў. Усё нармальна. Зараз буду альбо страляцца, альбо здавацца», — сказаў ён у размове з радыёстанцыяй.

Вядома, што ў студзені Арбітражны суд Масквы меў разгледзець пазоў аб банкруцтве прадпрыемства.

Ваша меркаваньне

Паказаць камэнтары

XS
SM
MD
LG