Лінкі ўнівэрсальнага доступу

Аўстрыйскі канцлер раскрытыкаваў цяперашні падыход ЭЗ да мігрантаў


Сэбастыян Курц

Фэдэральны канцлер Аўстрыі Сэбастыян Курц назваў памылковым ужываньне фіксаваных квот для разьмеркаваньня ўцекачоў па краінах Эўрапейскага зьвязу.

У інтэрвію выданьню Bild am Sonntag, апублікаваным у нядзелю, 24 сьнежня, Курц падкрэсьліў, што патрабаваньне Брусэлю да дзяржаваў ЭЗ прымаць уцекачоў згодна з квотамі не спрыяе разьвіцьцю эўрапейскай супольнасьці. Рашэньне аб разьмеркаваньні па дзяржавах ЭЗ да 120 тысяч нелегальных мігрантаў было прынятае ў Брусэлі ў 2015 годзе. Тады асноўная частка ўцекачоў знаходзілася ў Грэцыі і Італіі.

Сэбастыян Курц лічыць, што працяг такога курсу адносна мігрантаў можа прывесьці, як ён выказаўся, да ўзмацненьня расколу ў ЭЗ. Аўстрыйскі канцлер лічыць, што кожная дзяржава ў складзе ЭЗ павінна сама вырашаць, ці будзе яна прымаць мігрантаў і калі так, то ў якой колькасьці. Курц таксама адзначыў, што мігранты імкнуцца, галоўным чынам, у Нямеччыну, Аўстрыю і Швэцыю, але не ў Баўгарыю або Вугоршчыну.

У чэрвені 2017 году супраць раўнамернага разьмеркаваньня міграцыйнай нагрузкі ў ЭЗ выказалася таксама Чэхія, якая раней заяўляла пра гатовасьць выканаць патрабаваньні Брусэлю. Разам з Прагай у праграме разьмеркаваньня адмаўляюцца ўдзельнічаць Вугоршчына, Румынія, Польшча і Славаччына, адзначае Deutsche Welle.

XS
SM
MD
LG