Лінкі ўнівэрсальнага доступу

Вярхоўны суд пакінуў бязь зьменаў прысуд «чорным рыэлтарам»


Разгляд справы «чорных рыэлтараў» у Магілёўскім абласным судзе, ліпень 2017 году

Вярхоўны суд пакінуў бязь зьменаў прысуды Магілёўскага абласнога суду фігурантам справы «чорных рыэлтараў». Апэляцыйныя скаргі іх абаронцаў таксама пакінутыя без задавальненьня.

Рашэньне агучыла калегія Вярхоўнага суду, піша БелаПАН.

У ліпені Магілёўскі абласны суд прызнаў Сямёна Беражнога, а таксама Ігара і Тацяну Гершанковых вінаватымі ў забойстве шасьці чалавек і падрыхтоўцы да ўчыненьня забойства яшчэ траіх.

Ігар Гершанкоў і Сямён Беражны былі асуджаныя да вышэйшай меры пакараньня.

Іншым фігурантам справы прысудзілі турэмнае зьняволеньне: Тацяна Гершанкова атрымала 24 гады турмы з канфіскацыяй маёмасьці, а Барыс Калесьнікаў — 22 гады і адзін месяц калёніі строгага рэжыму.

Судовы разбор па гэтай гучнай справе доўжыўся каля васьмі месяцаў.

Кожнаму зь фігурантаў справы было выстаўленае абвінавачаньне па некалькіх артыкулах Крымінальнага кодэксу.

Злачынствы адбываліся цягам 6 гадоў — з 2009 да 2015 году. Ахвяраў выбіралі сярод адзінокіх грамадзян, якія злоўжываюць алькаголем. Карыстаючыся цяжкім матэрыяльным становішчам гэтых людзей, абвінавачаныя ўгаворвалі іх прадаць жытло, а ўзамен абяцалі дапамагчы з набыцьцём новага. Пасьля зьдзелкі кліентаў забівалі і хавалі ў загадзя выкапаных магілах.

Падчас разгляду апэляцыі ў Вярхоўным судзе Тацяна Гершанкова заявіла, што была асуджаная за злачынствы, да якіх ня мела ніякага дачыненьня. Сямён Беражны спачатку дэманстраваў абыякавасьць, а пасьля заявіў, што хоча быць пакараны, нягледзячы на просьбу зьмякчыць прысуд. Таксама ён заявіў, што ілжыва сьведчыў супраць Тацяны Гершанковай у судзе першай інстанцыі.

«Чорныя рыэлтары» могуць папрасіць памілаваньня ў кіраўніка дзяржавы. Гэта можна зрабіць на працягу 10 сутак пасьля атрыманьня копій прысуду.

Сёлета ў Беларусі было вынесена ўжо тры сьмяротныя прысуды. Акрамя Ігара Гершанкова і Сямёна Беражнога, у сакавіку Гомельскі абласны суд прысудзіў 32-гадоваму Аляксею Міхалені вышэйшую меру пакараньня за забойства двух чалавек з асаблівай жорсткасьцю.

«Іх будуць сьпяшацца расстраляць»: падрабязнасьці пра «чорных рыэлтараў» ад былога фігуранта справы

XS
SM
MD
LG