Расея і Кітай раскрытыкавалі новую стратэгію нацыянальнай бясьпекі прэзыдэнта ЗША Дональда Трампа, якая называе іх супернікамі Вашынгтону, што імкнуцца падарваць уладу і інтарэсы ЗША.
Прэс-сакратар прэзыдэнта Расеі Ўладзіміра Пуціна Дзьмітрый Пяскоў заявіў 19 сьнежня, што новая стратэгія мае «імпэрскі характар» і абвінаваціў Вашынгтон у тым, што той «чапляецца за аднапалярны сьвет». Масква «ня можа прызнаць, што Расея разглядаецца як пагроза бясьпецы Злучаных Штатаў», — сказаў Пяскоў журналістам.
МЗС Кітаю заклікаў Вашынгтон адмовіцца ад таго, што ён назваў «мэнталітэтам халоднай вайны», заявіўшы, што Кітай заўсёды быў удзельнікам глябальнага разьвіцьця і абаронцам міжнароднага парадку. «Супрацоўніцтва — адзіны правільны выбар для Кітаю і Злучаных Штатаў», — заявіла прэс-сакратарка міністэрства Хуа Чунінг.
18 сьнежня, амаль праз 11 месяцаў пасьля пачатку працы новай адміністрацыі ЗША, Дональд Трамп прадставіў ў Вашынгтоне стратэгію нацыянальнай бясьпекі ЗША.
Стратэгія вызначае тры групы сілаў, якія кідаюць выклік парадку «міру, стабільнасьці і калектыўнай бясьпекі».
Першая група ўключае такія краіны, як Расея і Кітай, якія «імкнуцца да стварэньня новага сусьветнага парадку як у вайсковым, так і ў эканамічным пляне». На думку прадстаўнікоў адміністрацыі, гэта можа нанесьці шкоду або перашкодзіць амэрыканскім інтарэсам.
У другую групу ўваходзяць «рэжымы-ізгоі», такія як Паўночная Карэя і Іран, якія хочуць стварыць зброю масавага зьнішчэньня пры адначасовай падтрымцы тэрарызму і іншай дэстабілізуючай дзейнасьці.
У апошнюю групу ўваходзяць транснацыянальныя тэрарыстычныя арганізацыі і злачынныя сындыкаты.
