Начальнік дэпартамэнту грамадзянства і міграцыі Міністэрства ўнутраных справаў Аляксей Бягун на прэс-канфэрэнцыі ў Менску 18 сьнежня заявіў, што колькасьць мігрантаў, якія прыцягваюцца ў краіну, за дзевяць месяцаў 2017 году скарацілася ў параўнаньні з такім жа леташнім пэрыядам амаль удвая (з больш як 20 тыс да 12,3 тыс), паведамляе БелаПАН.
«Колькасьць працоўных мігрантаў зьніжаецца з-за цэлага шэрагу прычынаў, — растлумачыў прадстаўнік МУС. — Гэта ня толькі звужэньне рынку працы і скарачэньне прапановаў рынку працы. Цяпер у многіх галінах укараняюцца навукаёмістыя вытворчасьці, якія не патрабуюць значнай колькасьці замежных грамадзянаў».
Другі трэнд — павелічэньне колькасьці беларусаў, якія зьяжджаюць на заробкі за мяжу, падкрэсьліў Бягун.
«Гэта зьвязана ў тым ліку зь лібэралізацыяй рынку працоўных паслуг на тэрыторыі Рэспублікі Польшчы. Яна становіцца другой паводле колькасьці дзяржавай, куды едуць працаваць беларусы», — сказаў ён.
На першым месцы застаецца Расея. За дзевяць месяцаў 2017 году ў РФ зь Беларусі афіцыйна зьехалі працаваць 4764 чалавек, у Польшчу — 2102, паведаміў Бягун. На 1 сьнежня афіцыйна выехалі на працу за мяжу больш за 10 тыс суайчыньнікаў.
Паводле кіраўніка прадстаўніцтва Міжнароднай арганізацыі міграцыі ў Беларусі Зэйнала Гаджыева, рэальная сытуацыя з працоўнай міграцыяй беларусаў за мяжу моцна адрозьніваецца ад афіцыйнай статыстыкі.
«Статыстыка адзначае толькі тых, хто афіцыйна рэгіструецца, — сказаў ён. — Думаю, насамрэч выяжджаюць зь Беларусі на заробкі ў дзясяткі разоў больш».
