Лінкі ўнівэрсальнага доступу

Хакера, які ўзламаў адзін зь беларускіх банкаў, экстрадавалі ў Менск з Баўгарыі


Ілюстрацыйнае фота

Супрацоўнікі Нацыянальнага цэнтральнага бюро Інтэрполу ў Беларусі і ўпраўленьня наглядна-выканаўчай дзейнасьці МУС 16 сьнежня экстрадавалі з Сафіі (Баўгарыя) мужчыну, які абвінавачваецца ў несанкцыянаваным доступе да кампутарнай сыстэмы аднаго зь беларускіх банкаў, паведамляе прэсавая служба МУС.

Беларуская міліцыя ініцыявала вышук хакера па лініі Інтэрполу ў жніўні 2017 году. У тым жа месяцы ён быў затрыманы ў Баўгарыі. Паводле інфармацыі праваахоўнікаў, мужчына замяшаны ў крадзяжы грошай шляхам выкарыстаньня кампутарнай тэхнікі ўлетку 2016 году.

Згодна з матэрыяламі справы, група хакераў узламала кампутарную сыстэму банка і з дапамогай шкоднага праграмнага забесьпячэньня атрымала магчымасьць аддаленага кіраваньня банкаматамі фінансавай установы.

За некалькі гадзінаў хакер разам з саўдзельнікамі скраў 527 тысяч даляраў, 67,5 тысяч эўра і амаль 109 тысяч беларускіх рублёў з 27 банкаматаў, разьмешчаных у Менску, Магілёве і Віцебску.

Была ўзбуджаная крымінальная справа паводле часткі 4 артыкулу 212 Крымінальнага кодэксу Беларусі (крадзёж, шляхам выкарыстаньня кампутарнай тэхнікі, здзейсьнены арганізаванай групай у асабліва буйным памеры). Санкцыі па гэтым артыкуле прадугледжваюць да 15 гадоў пазбаўленьня волі.

З пачатку году гэта ўжо 13-я экстрадыцыя ў Беларусь.

Як хлопцы з Рэчыцы робяцца ўсясьветна вядомымі хакерамі

XS
SM
MD
LG