Лінкі ўнівэрсальнага доступу

Краіны Эўразьвязу не дамовіліся пра квоты на расьсяленьне мігрантаў


Лягер для ўцекачоў у Бэрліне

Краіны Эўразьвязу не змаглі дамовіцца пра квоты на расьсяленьне мігрантаў. Як заявіла пасьля перамоваў канцлерка Нямеччыны Ангела Меркэль, для вырашэньня гэтага пытаньня яшчэ трэба будзе «шмат працы».

Паводле зьвестак Эўракамісіі, з 160 тысяч мігрантаў, якія прыбылі ў Італію і Грэцыю з 2015 года, паміж краінамі ЭЗ удалося разьмеркаваць 32 тысячы. У мінулым годзе эўрапейскія памежнікі зафіксавалі амаль два мільёны выпадкаў нелегальнага перасячэньня зьнешніх межаў ЭЗ.

Першы дзень саміту Эўразьвязу завяршыўся без выніковай заявы. Афіцыйныя вынікі дыскусіі па міграцыі падвядуць на прэс-канфэрэнцыі ў пятніцу. У другі дзень саміту лідары краін ЭЗ будуць абмяркоўваць будучыню эўразоны і вынікі перамоваў па Брэксыце.

7 сьнежня Эўрапейская камісія падала пазоў у суд ЭЗ супраць Вугоршчыны, Польшчы і Чэхіі. Гэтыя краіны адмаўляюцца прымаць бежанцаў па квотах, зацьверджаных ЭЗ два гады таму. Эўрапейскі суд можа аштрафаваць дзяржавы і абавязаць іх выконваць пагадненьне.

У падтрымку разьмеркаваньня бежанцаў выступалі, у прыватнасьці, Нямеччына, Францыя і Швэцыя. Згодна з праграмай абавязковых квот, дзяржавы-чальцы ЭЗ павінны прыняць 120 тысяч мігрантаў, якія прыбылі ў Грэцыю і Італію.

XS
SM
MD
LG