Як паведамляе Сьледчы камітэт, супрацоўнікі Ўпраўленьня расьсьледаваньня злачынстваў супраць інфармацыйнай бясьпекі МУС Беларусі атрымалі зьвесткі пра тое, што адным з удзельнікаў кібэрзлачыннай сеткі быў грамадзянін Беларусі. Ён зьяўляўся адміністратарам форумаў, на якіх абмяркоўваліся пытаньні супрацьпраўных захадаў у сфэры высокіх тэхналёгій.
Асобу ідэнтыфікавалі, ім аказаўся 34-гадовы жыхар Гомельскай вобласьці. Супрацоўнікі ФБР ЗША ажыцьцявілі закуп у беларуса праграмнага забесьпячэньня. Зыходны код праграмы быў правераны адмыслоўцамі ў галіне інфармацыйнай бясьпекі, якія далі заключэньне аб яго шкоднасьці. Гэта «траян» для загрузкі іншага шкоднага праграмнага забесьпячэньня, які дазваляе фіксаваць розныя дзеяньні карыстальніка, зьбіраць зьвесткі з наведаных ім вэб-сайтаў, атрымліваць захаваныя лагіны і паролі і выкарыстоўваць іх для доступу да акаўнтаў, дыстанцыйна ажыцьцяўляць DDoS-атакі.
Падчас сьледзтва выяўлена, што мужчына дапамагаў інтэрнэт-суразмоўцам набываць і абнаўляць шкодныя праграмы, а таксама аказваў паслугі тэхпадтрымкі.
За кожную ўгоду гамяльчук атрымліваў 500 даляраў, за кожнае абнаўленьне праграмнага забесьпячэньня — 10 даляраў. Сьледчыя высьвятляюць колькасьць эпізодаў і атрыманы прыбытак ад такой дзейнасьці.
Увосень 2016 году карпарацыя Microsoft паведаміла: штомесяц згаданым праграмным забесьпячэньнем заражалася да 4 мільёнаў кампутараў ва ўсім сьвеце.
Сёлета ў лістападзе была праведзеная глябальная міжнародная апэрацыя, у часе якой выяўленыя прадаўцы, уладальнікі сэрвэраў і асобы, якія выкарыстоўвалі гэтую праграму.
Пачаткам апэрацыі паслужыла затрыманьне жыхара Гомля. Міністэрствам ўнутраных спраў Беларусі атрыманыя прамыя доказы ўчыненьня злачынстваў зь яго боку.
Дзеяньні затрыманага кваліфікаваныя паводле ч. 2 арт. 354 Крымінальнага кодэксу Рэспублікі Беларусь. Яму прад’яўленае абвінавачваньне і ўжытая мера стрыманьня ў выглядзе ўзяцьця пад варту.