Лінкі ўнівэрсальнага доступу

ЗША адмовіліся ад удзелу ў глябальнай дамове аб міграцыі


Ілюстрацыйнае фота. Нелегальныя мігранты з Лацінскай Амэрыкі выходзяць з аўтобуса Памежнай службы ЗША ў Арызоне

Злучаныя Штаты ня будуць станавіцца ўдзельнікамі глябальнага дамовы аб міграцыі, якую плянуецца прыняць у 2018 годзе, бо ён яна не адпавядае інтарэсам краіны. Пра гэта абвясьціла ў суботу пастаяннае прадстаўніцтва ЗША пры ААН.

«Сёньня [2 сьнежня — РС] місія ЗША пры ААН праінфармавала генэральнага сакратара ААН аб тым, што Злучаныя Штаты спыняюць свой удзел у глябальнай дамове аб міграцыі», — гаворыцца ў паведамленьні.

У дыпмісіі нагадалі, што ЗША пагадзіліся ўдзельнічаць у працэсе распрацоўкі дамовы ў 2016 годзе, калі прэзыдэнцкі пост займаў дэмакрат Барак Абама. Пры ім амэрыканскі бок далучыўся да Нью-ёркскай дэклярацыі, прынятай 19 верасьня 2016 году. У дэклярацыі ўсё 193 краіны-сябры ААН абавязаліся прыняць у 2018 годзе дзьве глябальныя дамовы, якія будуць тычыцца кіраваньня плынямі міграцыі і мерамі ў дачыненьні да ўцекачоў.

«Нью-ёркская дэклярацыя зьмяшчае мноства палажэньняў, якія не адпавядаюць палітыцы ЗША ў галіне міграцыі і ўцекачоў, а таксама прынцыпам адміністрацыі [дзейнага прэзыдэнта ЗША — РС] Трампа», — гаворыцца ў заяве амэрыканскай дыпмісіі.

Нікі Гэйлі
Нікі Гэйлі

Камэнтуючы гэты крок Вашынгтону, сталы прадстаўнік ЗША пры ААН Нікі Гэйлі заявіла, што «глябальны падыход» у Нью-Йоркскай дэклярацыі 2016 году па справах уцекачоў і мігрантаў «проста не сумяшчальны з сувэрэнітэтам ЗША». Гэйлі адзначыла, што «Амэрыка ганарыцца сваёй імігранцкай спадчынай і нашым даўнім маральным лідэрствам у забесьпячэньні падтрымкі мігрантаў і ўцекачоў насельніцтва па ўсім сьвеце».

«Але нашы рашэньні па іміграцыйнай палітыцы заўсёды павінны быць зробленыя амэрыканцамі і толькі амэрыканцамі», — дадала яна. «Мы будзем вырашаць, як лепш кантраляваць свае межы і каму будзе дазволена ўяжджаць нашу краіну».

Заява была зробленая напярэдадні заплянаванай трохдзённай канфэрэнцыі па Глябальнай дамове на 4-6 сьнежня 2017 году ў Мэксыцы, на якой будуць абмяркоўвацца рэкамэндацыі па дапрацоўцы гэтай дамовы, фармальна вядомай як Глябальная дамова аб бясьпечнай, упарадкаванай і Рэгулярнай міграцыі (GCM).

Раней у гэтым годзе ЗША абвясьцілі пра выхад з Парыскага пагадненьня па клімаце — міжнароднай дамовы, нацэленай на тое, каб прадухіліць нэгатыўныя наступствы глябальнага пацяпленьня.

Ваша меркаваньне

Паказаць камэнтары

XS
SM
MD
LG