Лінкі ўнівэрсальнага доступу

Асуджаныя за згвалтаваньне магілёўскія міліцыянты спрабуюць абскардзіць прысуд


Злачынства адбылося ў ноч на 27 лютага 2016 году. Пасьля суду двое былых участковых атрымалі па 12 гадоў у калёніі ўзмоцненага рэжыму.

Старшыня Магілёўскага абласнога суду прыняў да разгляду наглядную скаргу асуджаных — былых супрацоўнікаў Ленінскага РУУС Магілёва. Пра гэта паведамляе БЕЛАПАН.

Пра злачынства стала вядома ў красавіку 2016 з публікацый у СМІ. Міністр МУС Ігар Шуневіч на пытаньне, ці былі тады яшчэ падазраваныя ў зьдзяйсьненьні злачынства дзейснымі супрацоўнікамі міліцыі, адказаў: «Былыя супрацоўнікі органаў унутраных спраў».

Паводле матэрыялаў справы, тры старэйшыя лейтэнанты міліцыі, участковыя інспэктары Ленінскага РУУС Магілёва адпачывалі ў начным клюбе "Форум«.Пазнаёміліся з двума дзяўчатамі і паехалі на кватэру да свайго знаёмага. Там ужывалі алькаголь, адзін з участковых і дзяўчына пакінулі кватэру. Двое міліцыянтаў, як давяло сьледзтва, зьбілі і згвалцілі дзяўчыну, якая засталася ў кватэры. У матэрыялах суду гаворыцца пра 39 удараў на целе пацярпелай, якія прызналі лёгкімі цялеснымі пашкоджаньнямі.

На паседжаньнях суду былыя міліцыянты віну не прызнавалі і заяўлялі, што ўсё адбывалася па ўзаемнай згодзе. А цялесныя пашкоджаньні дзяўчына нібыта атрымала, калі ўпала ў начным клюбе.

29 красавіка 2017 году Магілёўскі раённы суд прызнаў віну двух участковых у згвалтаваньні і гвалтоўных дзеяньнях сэксуальнага характару. Кожны атрымаў па 12 гадоў у калёніі ўзмоцненага рэжыму. Трэці міліцыянт асуджаны на 5 гадоў за іншае злачынства — ня здаў 27 баявых патронаў, якія былі знойдзеныя мясцовым жыхаром, і не зрабіў дзеяньняў па росшуку вінаватых у незаконным звароце боепрыпасаў. Усе трое пазбаўленыя званьня «старэйшы лейтэнант міліцыі».

Паведамляецца, што бацька аднаго з асуджаных за згвалтаваньне перадаў пацярпелай 20 тысяч даляраў у кошт кампэнсацыя маральнай шкоды. Але дзяўчына абскардзіла прысуд і патрабуе па 20 тысяч рублёў яшчэ ад двух іншых фігурантаў.

Прысуд быў абскарджаны пракурорам як занадта мяккі. Абвінавачаныя прасілі прысуд адмяніць і настойваюць на сваёй невінаватасьці.

Магілёўскі абласны суд 27 ліпеня пакінуў пакараньне ў сіле, але пытаньне кампэнсацыі маральнай шкоды пацярпелай накіравана на новы разгляд.

Цяпер асуджаныя спрабуюць зьмяніць прысуд, накіраваўшы наглядную скаргу на імя старшыні Магілёўскага суду.

Ваша меркаваньне

Паказаць камэнтары

XS
SM
MD
LG