Расейскі самалёт праляцеў прыблізна за 15 мэтраў ад амэрыканскага, што выклікала моцную турбулентнасьць і прымусіла пілётаў зьмяніць вышыню, паведамляе Associated Press.
Прадстаўнік сілаў ЗША ў Эўропе Хуан Мартынэс назваў манэўр расейскага Су-30 «небясьпечным перахопам». Ён удакладніў, што амэрыканскі самалёт P-8A «праводзіў штатную апэрацыю ў міжнароднай паветранай прасторы». У міністэрстве абароны Расеі сьцьвярджаюць, што зьнішчальнік прыйшлося падняць у паветра, паколькі амэрыканскі самалёт на вялікай хуткасьці набліжаўся да дзяржаўнай мяжы.
Падобныя перахопы адбываюцца рэгулярна, аднак гэта першае «небясьпечнае збліжэньне» ад чэрвеня. Тады камандаваньне сілаў ЗША ў Штутгарце расказала пра інцыдэнт над Балтыйскім морам. Расейскі зьнішчальнік падляцеў да самалёта ЗША настолькі блізка, што на фотаздымках можна было разглядзець пілёта ў кабіне.
